Os Mannskor på haustjakt

Os Mannskor har tradisjonen tru starta med ei venlegsinna haustjakt på nye medlemer.

Mannskoret har starta oppatt sesongen og har alt hatt tre øvingskveldar, og på laurdag kan du høyra dei utanfor Oselvarnaustet i samband med kystsogedagane.

Tradisjonen tru har koret også starta med ei venlegsinna haustjakt på nye medlemer. Midt på dagen på laurdag kan du også høyra koret syngja på handlesenteret AMFI på Flåten. Føremålet er sjølvsagt å gleda folk med fin song, men koret er stadig ute etter nye medlemer, og på AMFI kan songinteresserte menn både få høyra koret og få vita meir om kva dei driv med.

Mannskoret er ein aktiv gjeng og seinast i vår arrangerte dei songarstemne på Os med mest 600 deltakarar.

Det er øving på Nore Neset Ungdomsskule kvar tysdag kveld. Der kan du møta gode songkameratar og ein glad gjeng. Koret tel i dag omlag 40 aktive medlemer, men det er plass til fleire.

På haustprogrammet står det mellom anna søndagstur til Voss og synging i Vangskyrkja om kvelden saman med eit lokalt kor. 1. Søndag i advent (27. november) er det tradisjon å halda adventskonsert i Nore Neset kyrkje og dette året er ikkje noko unntak. Dette året har vi med oss damekoret Paradur frå Paradis i Bergen.

Til våren planlegg koret tur til ein eller annan songfestival innanlands. Kor det blir, er ikkje endeleg bestemt, men truleg vert det til Shantyfestivalen i Langesund. Her inngår det eventuelt båttur frå Bergen via Danmark til Langesund.

Jan Terje Skutlaberg

Os Mannskor

Formann