Os Musikkforening inviterer til "Før NM-konsert"

Som generalprøve til NM, inviterer Os Musikkforening til konsert i Oseanasalen onsdag kveld.

NM for janitsjarkorps, som kvart år vert arrangert i Trondheim, er det største korpsarrangementet i landet. Her møtest vaksenkorps frå heile landet. Dette skjer årleg i helga før palmehelga, i år 11. og 12. mars. Meir enn 100 korps deltek.

Til generalprøven onsdag får Os Musikkforening besøk av Fana Musikklag, Skjold Nesttun Janitsjar og Alvøens Musikkforening.

- No har alle øvd godt i mange veker på sine respektive musikkstykke, og dette blir god konserttrening for korpsa før turen går til Trondheim berre få dagar etter, fortel musikkforeningen i ei pressemelding.

I NM vert det tevla i åtte divisjonar. Fana Musikklag stiller i 6. divisjon med dirigent Bjarte Riseng. Skjold Nesttun Janitsjar stiller i 1.divisjon og Alvøens Musikkforening stiller i 2. divisjon. Begge korpsa blir dirigerte av Bengt Florvåg. Os Musikkforening deltek i 3. divisjon og blir dirigert av vår faste dirigent Per-Lorentz Milotzki.

- Det blir stas å spela NM-programmet vårt i Oseanasalen og vi gler oss stort til å høyra spennande korpsmusikk frå gjestene våre på onsdagskvelden. Og så gler vi oss kanskje like mykje til ei spennande helg i Trondheim, uttaler musikkforeininga.