Pokemon e' laus

Pokemon-hysteriet blir tatt til nye høgder når revyen «E da løye?» har premiere på Haugland neste laurdag.

Åsa Nord

asa.nord@osogfusa.no

Motefenomenet Pokemon er ein av fleire raude trådar i årets revy frå gjengen på Søre Neset. Motedop ein annan.

- Vi har fokusert på ulike ting som er vanedannande, fortel primus motor Runar Drønen.

Utvida kokkesøl

Enkelte av årets karakterar vil vera kjente gjengangarar for faste revygjester, medan andre er nye av året.

- Kokkesøl frå i fjor, med Ingrid Espelid og Øyvind Hellstrøm, er i år utvida med Brimi, Jamie Oliver og Gordon Ramsey, røper Drønen.

Blant dei nye er også Søftelands smartaste kar, Kåre Otto, medan ordføraren og blogghjelparen er av gjengangarane.

Pakkeproblem

Når Os & Fusaposten besøker gjengen på øving onsdag, er dei i full gong med øving på sketsjane.

- Det er merkeleg med piller, du kjøper dei mot éin ting, så får du ti andre problem med på kjøpet, seier mannen som les opp pakningsvedlegget på pillene han skal pakka med seg på ferie.

Han får plass til alt sitt i ei lita veske, medan kona har pakka fem-seks kolli.

- Kva har du i bagasjen din eigentleg? Ei symaskin? Kva skal du med symaskin, du som ikkje kan sy ein gong, spør han kona.

Vi skal ikkje røpa meir enn at ho også har pakka med seg ei løysing på det problemet.

Samansveisa gjeng

Laurdag 29. oktober er det premiere på revyen i to aktar, i ungdomshuset på Haugland.

- Vi set også søkelyset på integreringspolitikk for fusingane, og har laga song om konkursbuet Fusa, fortel Drønen.

Han har skrive fleire av tekstane og fungerer som både organisator og regissør, men han er langt frå åleine om ansvaret.

- Alle bidreg med alt, vi er ein godt samansveisa gjeng med seks-sju personar som har vore med sidan første revyen i 2010, fortel han.

Det var då dei tok opp att den gamle revytradisjonen på Søre Neset og sidan har dei vore fast innleiing til den årlege haustfesten i Nesjaheimen.

Bygde-harselas

Elleve personar står på scenen: Lise Scheie, Iain Parker, Kristine Tikkanen, Karianne Sæthre, Jan Helge Kordts, Camilla Haugland, Espen Sestøl, Marie Bjånesøy Ellingsen, Johnny Olsen, Linda Nytræ og Runar Drønen. Dei fleste er frå Søre Neset, men hegglandsdølen Johnny Olsen og søftelending Linda Nytræ er med og må tola ein del harselas av sine sambygdingar.

- Det må dei leva med skal dei vera med her, men dei er sporty folk og toler det godt, smiler Drønen.

Marianne Bergtun skjuler seg i kulissane, for ho har oppgåva som sufflør. Steinar Lyssand og Knut Vidar Garlid er med som musikarar.

To veker etter premieren blir det to framsyningar til, fredag 11. og laurdag 12. november. Begge laurdagane blir det dans med musikk av "Tommy og Tiger'n" etter revyen.