Prikken over i-en på ei flott Session-samling
Medan Glenn Erik Haugland var oppteken med Session Studio E39 i Os vart han tildelt komponiststipend under eit bransjetreff i Oslo.
Glenn Erik Haugland har fått mykje omtale og skryt for komponist-prosjektet sitt Session Studio E39 i Os. I helga fekk han også økonomiske midlar til å driva prosjektet vidare.
Ei stor ære
Glenn Erik hadde fullt program på Haugland og hadde ikkje høve til å vera med på komponist-bransjetreffet i Oslo denne helga. Dermed gjekk han glipp av heider, skryt og høve til å sjølv ta imot ein sjekk på 50.000 kroner frå Oddvar S. Kvams komponiststipend.
Artikkelen held fram under annonsen.
I sitt fråvær fekk han komponist-kollega Torstein Aagaard Nilsen til å ta imot stipendet.
- Jaudå, eg skulle sjølvsagt vore der og fått med meg heideren, men eg hadde Session-gjengen og ein av Noregs absolutt største komponistar, Olav Anton Thommassen, på besøk her på Haugland, så då måtte eg nesten vera her, ler Haugland.
- Me hadde helgesamling. Eg korkje kunne eller ville stikka av, humrar Glenn Erik.
Han synest det er ei ære å få stipendet.
- Ettersom Oddvar S. Kvams er eit heilt nytt komponiststipend, er det ekstra stort å vera blant mottakarane. Dessutan er 50.000 kroner ein habil sum, som kjem godt med i vår vidare satsing med Session, seier Haugland.
Den andre som fekk komponiststipend denne helga var bergens-dirigenten Haldis Rønning.
Gode ord
Leiar i Musikkfaglig utvalg, Synne Skouen, sa mellom anna dette då stipendet til Glenn Eirik Haugland vart delt ut:
- Når me først skulle finna ein mottakar for Oddvar S. Kvams rause julegåve, peika pila nokså raskt på Glenn Erik. Mykje fordi prosjekta hans ofte handlar om å involvera musikk for og med born og unge, eller med verstingar og naboar - og difor handlar om å byggja bru. Glenn Erik er ein brubyggjar, ikkje åleine, han gjer det ofte med sin kjære, Heidi Tronsmo. I år og neste år heiter Glenn Eriks prosjekt Studio Session E39. Prosjektet handlar om musikk. Om å gje unge menneske tilgang til nytt og gamalt verkty, som skal sette dei i stand til å skapa musikk sjølv.
Artikkelen held fram under annonsen.
Pop-produsent
Glenn Eirik er ikkje i tvil om at stipendet kjem godt med. Han har alt fleire idear til kva det kan gå til.
- Med Sessiong-gjengen har me fleire helgesamlingar i året. Denne helga hadde me det utruleg kjekt og lærerikt med Olav Anton Thommessen som mentor. Til neste samling vil me hyra inn ein pop-produsent. Slike instruktørar kostar. I så måte er dette stipendet svært kjærkome, seier Haugland.
