UKM frå Oseana til Breidablikk

Den lokale kulturmønstring (UKM) for Os og Fusa vert i år arrangert i ungdomshuset Breidablikk i Sævareid.

Jostein Halland

jostein@osogfusa.no

Fusa og Os har dei tre siste åra samarbeidd om UKM i Oseana, der kultureininga i Os har hatt største jobben med arrangementet. I år, søndag 14. februar, er det Fusa sin tur til å ha hovudansvaret for gjennomføringa.

- Det blir spennande å ha arrangementet i det nyleg nyoppussa lokale kulturhuset i Sævareid, seier kulturleiar i Fusa, Erik Vangsnes.

Hausta stor applaus

Vangsnes fortel at Fusa onsdag fekk besøk av ein gjeng på promoteringsturné for UKM med framsyningar på Fusa vidaregåande og Fusa ungdomsskule. Her fekk publikum informasjon om UKM og smakebitar på stoff som det blir jobba med fram mot den lokale mønstringa.

- Først fekk publikum sjå og høyra eit lite sjølvlaga teaterstykke med gode dialogar og dansande "zombiar". Sist ut var Natasja Smørholm og Idar Rolland med ein duett song og piano som hausta stor applaus, fortel Vangsnes.

Alle typar kreativitet

UKM er open for born og unge i alderen 13-19 år. Det er mogeleg å ta del i den lokale mønstringa med alle typar kreative uttrykk. Dei mest vanlege kulturformene er musikk, film, dans og biletkunst.

- Men kanskje driv du i staden med kokkekunst, webdesign, kreative tekstar, tredreiing eller tatovering? Då er UKM tingen for deg, seier Vangsnes, som meir enn gjerne tek i mot spørsmål om påmeldinga eller sjølve arrangementet. I Os er kulturkonsulent Kjetil Osablod Grønvigh kontaktperson.

Fristen for å melda seg på er 1. februar.

Fylkesmønstringa går av stabelen på USF Verftet i Bergen 15.-17. april. Ein eigen jury avgjer kven frå Os og Fusa som får delta der.