Vil laga film om mamma

Filmfotograf Benjamin Langelands (25) store draum er å laga film om mamma: Danselærar og flyktning frå Chile, Patricia Langeland.

Anne Marie Aarøen Vangsnes

anne-marie@osogfusa.no

Benjamin Langeland hadde aldri noko val. Han måtte bli filmfotograf. Med ei mor innan dans og teater, og ein far som er fotograf, valde han eit yrke midt i mellom.

- Eg gjer den eine tingen eg føler at eg får til, smiler han og fortel om den spede byrjinga då han sprang rundt med eit filmkamera i skogen heime i Os. Eller var flittig deltakar på Os filmfestival med Frode Sirevåg og Vidar Bratlund-Mæland.

- Det har betydd mykje for meg. Eg hadde nok ikkje begynt med film utan filmfestivalen.

TV-debut

I dag er 25-åringen frå Os fast tilsett i Flimmer Film. Nyleg kunne du sjå TV-debuten hans «Motgangssupporteren» på TV 2.

Her følgjer han fotballag og supporterar i nedrykket frå eliteserien til andre divisjon.

- Eg har aldri vore spesielt interessert i fotball, men eg er svært oppteken av menneske. Og djupast sett er det det filmen handlar om.

- Ein filmskapar som er så interessert i menneske, kjenner seg kanskje aller mest heime i dokumentarsjangeren?

- Tja, både dokumentar og fiksjon kan jo handla om menneske. Men eg er blitt litt varm i trøya på det med å fortelja ekte historier.

I fjor var Benjamin i Kabul og gjorde opptak til serien Asylbarn på vg.tv.

- Det var ein fin kontrast å gå frå å laga film om noko verkeleg viktig, til å laga film om det viktigaste av det uviktige. Nemleg fotball, seier han.

- Alt handlar om å fortelja dei historiene som er viktige for folk.

Mamma Patricia

Når det gjeld kva historie som er viktigast for han personleg, er det ingen tvil.

- Ein dag skal eg laga film om mamma. Ho har ei utruleg historie som eg har kjent på kroppen sidan eg vart fødd, seier han.

- Er det viktig for henne at det er nettopp du som lagar den filmen?

- Ja, er du gal. Viss nokon skal laga film, skal det vera eg som gjer det. Men det får bli nokre år til enno, ler han.

Den komande tida har Benjamin tenkt å roa litt ned og laga reklamefilm og musikkvideoar. Slikt gjev pengar i kassa.

- Butikken skal trass alt gå rundt også, ler han.

- Men eg byrjar nok på større og meir ambisiøse prosjekt igjen snart, seier han.