Eg har kjent på fortvilinga av å vera på eit redningsoppdrag utan å ha mannskap med seg

Eg er svært, svært skuffa over budsjettforslaget til Frp og Høgre.

Som tidlegare brannsjef i gamle Fusa kommune tenkjer eg at det er lov å seia at eg no er svært, svært skuffa over budsjettforslaget til Frp og Høgre. Dei foreslår å endra vaktordninga for Bjørnafjorden brann og redning i Eikelandsosen ved å ta vekk dreiande vakt.

Å ha ei dreiande vaktordning i tenesta brann og redning betyr at eit vaktlag rykkjer ut ved hendingar. Det som no blir foreslått, er å skrinleggja denne ordninga og gå tilbake til gamal ordning utan vaktlag. Dette betyr at ein kan oppleva at berre éin person (les: utrykkingsleiar) kjem på hendingar. Dette seier seg sjølv gir utryggleik for både mannskapet og innbyggjarane.

Forslaget om å ta vekk dreiande vakt er ei nedbygging av tenesta og ikkje forsvarleg for innbyggarane i Bjørnafjorden aust. Brann og redningstenesta er ein heilt grunnleggjande beredskap og redningsressurs i samfunnet.

Brann og redning står i førstelinja i dei fleste hendingar i heile krisespekteret og må satsast på. Det kostar å ha ein kommune som er stor i areal, og det er vel ikkje på tryggleik ein skal tenkja sparing. Det kan få konsekvensar som eg ikkje vil tenkja på.

Eg er godt kjent med begge modellane med og utan dreiande vakt etter eit langt liv i brann og redningstenesta i Os og Fusa. Det er stor forskjell, og eg har kjent på fortvilinga av å vera på eit redningsoppdrag utan å ha mannskap med seg.

Det er tre år sidan dreiande vakt blei innført for Bjørnafjorden aust. Det er no trygt for brannmannskap og innbyggjarane. Forslaget Frp og Høgre no kjem med - å avvikla ordninga - er å gå baklengs inn i framtida.

Sats på eit trygt samfunn for innbyggjarane i Bjørnafjorden aust også, det fortener dei. Kva hjelper det med ein stor, ny og fin brannstasjon utan folk? Sats på dei tilsette sin kompetanse og skaff oss eit trygt samfunn med ei redningsteneste som fungerer. Det kan eg ikkje sjå vil skje med forslaget til Frp og Høgre.

Gunnar Hatlelid

Pensjonert brannsjef