Kor blei det av lokalavisa mi?
Nytt politisk styre i kommunen og brått blei lokalavisa ein miniversjon av Dagbladet med fokus på negativ formidling.
Lokalavisa mi har fortalt meg store og små nyheiter om livet i bygdo i heile mitt liv.
Det var konfliktar før og. Avisa Midthordland mot nye Os & Fusaposten. Os & Fusaposten vann den kampen.
Nye tider med moderne journalistikk kom til bygda vår. De som lokalavis kan vise til at de har pressa kommunen til meir openheit. Det heiar eg på!
Men kva har skjedd etter at Frp og Høgre mista makta? Kva har skjedd med debattklimaet i kommunestyret og i lokalavisa? Korleis bidrar de som lokalavis til eit positiv lokalmiljø? Eg er skuffa, både over tabloide overskrifter og det journalistiske innhaldet. Er det å vera kritisk til alt som skjer i kommunen vår, god journalistikk?
Kva samfunnsansvar har lokalpressa for å skape gode løysningar og å bidra med gode spørsmål som skapar samhald og gode løysingar for innbyggarane våre?
Kjære Os & Fusaposten, ver ei avis med varme og omtanke for alle i Os og Fusa, også for dei som kvar dag arbeider i og for at kommunen skal gjera det beste dei kan for innbyggarane våre.
Vis også fram det positive ved bygda vår. Vis at bygda vår består av meir enn vanskeleg ungdom, dårleg mat og politiske parti som er ueinige.
Eg utfordrar dykk til å ta tilbake integriteten og kasta visjonen om å bli ein filial av Dagbladet på fjorden!
