55 elevar og fem tilsette i karantene: - Foreldre og søsken må reisa heim snarast
Husstandsmedlemer må umiddelbart gå i ventekarantene.
Tidlegare i dag vart det kjend at ein tilsett ved Os ungdomsskule i går, onsdag, testa positivt for covid-19.
Testen vart teken i ein annan kommune, og har ikkje samband med ungdomsfesten sist veke.
Artikkelen held fram under annonsen.
Det skriv kommunen på si heimeside.
55 elevar i to 8. klassar og fem tilsette ved skulen er rekna som nærkontaktar.
Dei har fått beskjed om å testa seg snarast, og halda seg i karantene i 10 dagar.
Ventekarantene
Husstandsmedlemer av nærkontaktane må vera i ventekarantene til første negativ test ligg føre hos nærkontakten.
Os ungdomsskule har sendt heim elevane i dei to aktuelle 8. klassane, og gitt føresette beskjed via SMS.
Alle som bur saman med nærkontaktane eller andre tilsvarande nære, må altså vera i ventekarantene til nærkontaktane har fått negativt prøvesvar.
— Dette betyr at foreldre, søsken og andre nære skal reisa heim frå jobb, skule og barnehage snarast og halda seg i ventekarantene fram til testresultatet er klart, seier kommuneoverlege Klaus Melf.
Unntak for vaksinerte
Unntaket er dersom nærkontakt eller husstandsmedlemmer er fullvaksinerte mot covid-19 dei siste 6 månadane eller allereie har gjennomgått covid-19-sjukdom.
Artikkelen held fram under annonsen.
Då treng dei ikkje gå i karantene/ventekarantene, seier Melf.
Dersom ein nærkontakt har fått éin dose med vaksine for minst tre veker sidan, treng dei heller ikkje gå i karantene/ventekarantene.
— Men dei må likevel testa seg mellom dag tre og sju i denne perioden, seier Melf.
