Avlytta sambuaren på soverommet, i stova og i bilen

Tiltalte kunne ikkje talfesta kor mange gonger han hadde avlytta sambuaren i bilen.

Den fornærma kvinna skal i lang tid ha mistenkt at ho blei avlytta av sambuaren. Dette fordi at han skal forsnakka seg om forhold som kom fram på opptak han hadde gjort.

Det skal ha starta sommaren 2020. Tiltalte har kome med full tilståing i retten. Mannen har forklart at han starta med å avlytta den dåverande sambuaren på soverommet, ved hjelp av opptaksfunksjon på mobiltelefonen, som var skjult i ein bag.

Han forklarte også at han hadde putta ein mikrofon i jakka hennar som var plassert i stova. Det skal også ha blitt plassert ein mikrofon i bilen. Mannen kunne ikkje talfesta kor mange gonger avlytting i bil hadde funnen stad.

Då tiltalte trudde at han hadde mista den første mikrofonen han hadde kjøpt, gjekk han til innkjøp av ein ny mikrofon. Minnet på utstyret måtte lastast over på datamaskin før opptak kunne gjennomgåast. Retten finn at dette medførte at mannen måtte gjera ei rekkje handlingar over lang tid for å kunna driva med avlyttinga, og at kvar handling var eit val om å halda fram med den straffbare verksemda.

Belastninga som fornærma er utsett for som følgje av den langvarige avlyttingsperioden, tel også i skjerpande retning under vurderinga av straff. Det blir også lagt vekt på at andre personar kunne bli avlytta når dei var saman med fornærma, anten når dei var til stades eller via telefonsamtaler. Dette gjeld også heimebuande born.

Det har teke tid før saka kom opp og blei handsama i retten. Det straffbare forholdet skal ha opphøyrd mot slutten av 2021. Tiltalte har tilstått. Dette tel i formildande retning.

Post to i tiltalen går på at mannen i 50-åra skal ha oppbevart ammunisjon i ei bokhylle i bustaden sin i mai 2022. Dette har også tiltalte innrømma.

Mannen i 50-åra blei i Bergen tingrett dømt til 36 dagar i fengsel på vilkår, med ei prøvetid på to år. Han må også betala ei bot på 10.000 kroner.

Ammunisjonen vert inndrege. Det same gjeld lydopptakar.