Brann i bustad: Alle skal ha kome seg ut

Brannvesenet opplyser å ha god kontroll på staden.

Naudetatane rykte ut då det kom inn melding om brann i bustad søndag ettermiddag.

Kring klokka 12.30 blei det meld om brann i bustad. Meldinga skal ha kome inn via eit vaktselskap, opplyser Vest politidistrikt på X (tidlegare Twitter).

– Brann på eit kjøken, ingen skadde, alle har kome seg ut. Naudetatane rykkjer ut til staden, skreiv politiet på X.

110 Vest opplyste at røykdykkarar hadde rykt inn for kontroll.

Helge Lund ved 110 Vest opplyste til Os & Fusaposten klokka 13 at det har vore eit branntilløp på ein komfyr.

– Ein del av ventilatoren er smelta, men det har ikkje gått i ventilasjonssystemet. Vi har god kontroll og oversikt på staden. Vi har kontroll på alle som høyrer til adressa, fortalde Lund.