Briljerer stadig i manesjen

Til neste år er det 30 år sidan Jan-Ketil Smørdal, i ein alder av 25, starta sitt eige sirkus. 1. og 2. påskedag vitjar sirkusdirektøren og resten av Sirkus Agora Os.

– Det var dette eg ville halde på med som 24-åring. Eg hadde ein internasjonal karriere som balanseartist og ønskte å satsa. Eg fann ut at eg måtte gjera det medan eg framleis var ung, dum og med pågangsmot. Eg ser i dag at eg hadde heilt rett. Å starta sirkus i vaksen alder hadde aldri gått, seier Smørdal.

I påsken vitjar sirkusdirektøren Åsane, Knarvik og Osterøy, før han legg turen innom Os, og grusbanen ved Os ungdomsskule, 1. og 2. påskedag.

– Vi får veldig mange gode tilbakemeldingar på showet vårt. Det er kanskje den beste framsyninga i Sirkus Agora sin historie, meiner sirkusdirektøren, som feirer 30 år som direktør til neste år.

– Vi satsar på komikk i år. Vi har mellom anna ein ung, spretten og veldig morosam trampolineakrobat. I tillegg har vi ein erfaren og suksessrik klovn ved namn Pedro, samt klovneduoen Los Rivelinos. Dei pleier å slå godt an, seier Smørdal.

I manesjen med barnebarnet

Luftens prinsesse, Miss Sandra, byd på spenstige vendingar i ein eigendesigna lysekrone, medan ballsjongløren, Tony Garcia, som debuterte hjå Sirkus Agora som 15-åring, og som sidan har vore i manesjen i alle dei største sirkusa i Europa, får høve til å avslutta showet.

– I 2006 vart ein av aktørane i ein akrobattrio gravid, og kunne ikkje fullføra sesongen. Det er ein sirkusdirektør sitt mareritt. Men plutseleg oppdaga eg ein ung gut som stod og trente. Eg bad han om å trena litt ekstra, og sa at når datoen kjem og magen er blitt stor, så er det din tur. I dag nærmer han seg 28, og er ein ballsjonglør i moderne stil. Han sjonglerer med opp til 8 ballar, fortel Smørdal.

Sjølv vert sirkusdirektøren stadig vekk oppmoda om å gå i manesjen. På årets show har han med seg barnebarnet Ida (5) som assistent.

– Det kan ikkje bli større enn det. Hin dagen sa eg ho var veldig flink. Då svara ho at det gjer litt vondt å smile så lenge om gangen, seier han og ler.

Sirkusfamilie

Smørdal skildrar livet på vegen som eit eventyr. Det har sjølvsagt vore både oppturar og nedturar i løpet av dei 30 siste åra, men no er sirkuset, ifølgje direktøren, på ein kjempeopptur.

– Eg kjenner meg som ein litt utlært leiar. Eg har eit fantastisk personale og eit stort familieapparat rundt meg. Eg har to døtre som driv sirkusskule i Fyllingsdalen, ein svigerson som er teatersjef på Fyllingsdalen Teater, og ein niese som er med på vegen. Alle er involverte, seier Smørdal.

Som sirkusartist vert det naturleg nok ein del knall og fall. Første gang Smørdal knekte noko var på rådhustomta på Osøyro i 1983.

– Eg datt på ryggen og brakk nokre ryggvirvlar, seier han.

Etter det låg han i hardtrening og utvikla seg mykje som artist.

– Det var då eg lærte koppetrikset mitt, seier han.

Sirkusdirektøren fortel at utan framsyningane i distrikta, hadde det ikkje gått an å driva sirkus. Han og resten av gjengen gler seg til å koma attende til Os. Smørdal er ekstra glad for å kunna setja opp sirkusteltet sitt i sentrum denne gongen.

– Då vert den smørblide sirkusdirektøren ekstra smørblid, seier han og ler.

camilla.kvamme@osogfusa.no