Bygginga av etterlengta gang- og sykkelveg er like om hjørnet

– Om arbeidsvarslingsplanen vert godkjent, går vi i gang på måndag.

Tysdag inviterte Vestland fylkeskommune og entreprenør Bertelsen & Garpestad AS til informasjonsmøte på Borgafjellet barneskule.

– Prosjektet er smalt, utfordrande å byggja og vi må tenkja oss nøye om og vera forsiktige, men eg kan lova dykk at de kjem til å merka at vi er der, sa prosjektleiar hos Bertelsen & Garpestad, Pål Thornes.

I slutten av januar signerte verksemda frå Egersund kontrakten med Vestland fylkeskommune som er verdt 110,8 millionar kroner. Prosjektet omfattar utviding av noverande veg (1,2 kilometer) til to køyrefelt utan gul stripe, samt gang- og sykkelveg langs Hatvikvegen.

I tillegg skal Bjørnafjorden kommune etablera nytt VA-anlegg, BKK skal sanera kablar (lågspent), og det skal etablerast nye grøfter for høgspent og lågspent, samt telekablar. Frå Midtbøvegen/Sjoarvegen og ned til Lyssandfjæra skal overvatnet førast ned til sjø.

– Vi skal også ferdigstilla midtrabatten inn mot Hegglandsdalsvegen slik at det vert meir fornuftig å køyra der, opplyste prosjektleiar i Vestland fylkeskommune, Marius Navaresete Lydvo.

Av utfordringane Lydvo trekte fram knytt til prosjekteringa, er at det er eit smalt anleggsbelte, at ein tidlegare har gitt dispensasjon for byggjegrense mot veg, høgdeskilnader mellom veg og terreng, beslag av landbruksareal, overvatn, mjuke trafikantar og at det er lite rom for justering av veglinja.

– Reguleringsplanen er frå 2015. Men eg trur vi har fått det til på ein god måte, sa han.

– Skal ha respekt for dei som skal til og frå jobb

Bertelsen & Garpestad står bak bygginga av Åsen-Helleskaret også. Måndag tek dei til på arbeidet langs Hatvikvegen, om arbeidsvarslingsplanen vert godkjent.

– Planen er å starta ved den første bergskjeringa og jobba oss mot golfbanen, sa Thornes og la til:

– Som eg nemnte tidlegare, de kjem til å merka det dei åra vi er der. Samstundes skal vi ha respekt for dei som skal til og frå jobb, og som er nøydde til å nå den ferja om morgonen eller som skal heim og eta middag. Det er viktig at det som skal fungera i det daglege, er på plass, som helsevesen, naudetatar, søppel og post. Alt det skal vi ha kontroll på.

Truleg vert det jobbing frå måndag til torsdag. Når grøftene i Midtbøvegen/Sjoarvegen skal etablerast kan det også bli aktuelt med fredag- og laurdagsjobbing.

– Ønsket er å bli ferdige med arbeidet i hagane til privatpersonar så fort som mogleg, sa Thornes.

Av faremoment trekte han fram høge tre, sprenging, transport av massar, djupe grøfter, gravemaskinar og endring av terrenget.

– Arbeidet skal skje under trygge, gode forhold. Det skal vera trygg ferdsel for alle, understreka han.

Entreprenøren kjem til å etablera ein veg på utsida av dagens veg, slik at ein kan jobba i den eksisterande vegen. Målet er at trafikken skal flyta mest mogleg, men vert det naudsynt å stengja i periodar, vert det trafikkdirigentar på dagtid og lysregulering på kveld og natt.

– Hovudbodskapen er, held dykk unna gravemaskinane. Må de passera, ver snill å få augekontakt med den som sit i maskina, sa Thornes.

Prosjektleiaren la til at på Lysekloster skule hadde dei vore innom med ein lastebil for å visa borna kor lite ein faktisk ser når ein sit i lastebilen.

– Vi stiller gjerne på ein tilsvarande demonstrasjon på Borgafjellet, om ønskjeleg, sa han.

– Vi tek ansvar for at ungane får busskort

Av spørsmåla tilhøyrarane hadde, er kvifor fartsgrensa vert auka frå 50 til 60 km/t og om det er planlagt fartsreduserande tiltak, samt fotgjengarovergangar på strekkja.

– Kvifor fartsgrensa er auka, veit eg ikkje om eg kan svara så godt på. Vegen er prosjektert med den standarden, sa Lydvo og la til at ein kjem til å sanera fleire av avkøyrslene i samband med arbeidet.

– Det vil bli færre avkøyrsler enn i dag, når vegen er ferdig.

Ingen overgangsfelt eller fartsreduserande tiltak er planlagt.

– Det er standard prosedyre, sa byggjeleiar i Vestland fylkeskommune, Eivind Thane.

– Om det viser seg at det er behov for det i ettertid, må det gjennomførast trafikkteljingar, la han til.

– Kan de gå ein runde til på desse tinga, var det fleire som spurte.

– Vi tar det med oss, lova fylkeskommunen.

Spørsmålet om farleg skuleveg og busskort vart også løfta. Her skar prosjektleiaren frå Bertelsen & Garpestad gjennom.

– Då seier vi det slik at vi tek ansvar for at ungane langs Hatvikvegen får busskort, sa han til applaus frå dei frammøtte.

Frist for å ferdigstilla vegen er hausten 2026. Fylkeskommunen kunne også opplysa om at dei har starta eit reguleringsarbeid for ein annan del av Hatvikvegen, frå brua i Os sentrum til Hegglandsdalskrysset.

– Ting tek litt tid. Vi begynner smått og forsiktig, og så arbeider vi oss bortover på venstresida. Vi gler oss veldig til å koma i gang, sa Thornes og understreka at dei er oppteken av å ha ein god dialog med dei som vert råka av arbeidet.

– Vi skal få til arbeidet på ein trygg og god måte både for dei som bur i området, dei som køyrer gjennom og får våre eigne folk, slo prosjektleiaren fast.