Desse politikontora kan bli lagt ned

Ei arbeidsgruppe har kome med si tilråding til tenestestadstruktur for Vest politidistrikt.

Den interne arbeidsgruppa har no lagt fram sitt forslag til plassering av tenestestader og organisering i tenesteeiningar. Eller rettare sagt legg dei fram to forslag, for arbeidsgruppa er nemleg delt på midten. Det som i pressemeldinga vert omtala som "Forslaget" inneheld 25 tenestestader, 10 tenestee ningar og fire geografiske driftseiningar (GDE).

Den andre tilrådinga, som er omtala som "Alternativet", foreslår dei same 25 tenestestadene, 13 tenesteeiningar og 7 GDE`ar. Både "forslaget" og "alternativet" inneber å avvikla tenestestadene i Selje, Bremanger, Jølster, Askvoll, Hyllestad, Gaular, Balestrand, Luster, Aurland, Årdal eller Lærdal, Gulen, Solund, Osterøy eller Vaksdal, Austrheim, Samnanger, Ullensvang, Ulvik og Jondal. I tillegg vert Bergen nord, Bergen vest og Bergen sør politistasjonar føreslått avvikla.

- Tjenestestedene vi foreslår avviklet, var for sårbare for de kravene som stilles til tjenestesteder i Nærpolitireformen (reformen). Ved å avvikle disse blir det enklere å koordinere ressursene, prioritere bedre og nå målene, intensjonen og kravene i reformen, heter det i notatet frå arbeidsgruppa.

Halvparten av medlemene i arbeidsgruppa meiner at "alternativet" ikkje oppfyller krava til tenesteeiningar og GDE`ar på grunn av storleik og sårbarheit. Den andre halvparten meiner at det er rom for lokale tilpassingar. Spesielt med omsyn til forskjellar i geografi, befolkning og kriminalitetsmønster.

I Sør

Om geografisk driftseining Sør, der me finn Os og Fusa, skriv arbeidsgruppa dette i det som er omtala som "Forslaget":

- GDE Sør består av tjenesteenhetene Hardanger, Kvam og Os. I driftsenheten bor det 68.082 personer. En vekst på 3,5 prosent fra 2012. Veksten er størst i Os (med Austevoll) på 11 prosent. I Hardanger (med Kvinnherad) er det en reduksjon på 0,2 prosent. I Kvam (med Fusa og Tysnes) er det en vekst på 0,4 prosent. Befolkningsframskrivingen predikerer en vekst i Os (med Austevoll) på rundt 35 prosent. I Hardanger predikeres det en vekst på rundt fem prosent. I Kvam er veksten predikert å være rundt syv prosent. Kriminalitetsraten er i Hardanger 34,2 (Kvinnherad har 19,2). I Kvam 18,1 (Fusa og Tysnes har 28,1). I Os er kriminalitetsraten 35,8 (Austevoll har 15,8).

I Hardanger føreslår ein å avvikla tenestestadene i Ullensvang og Jondal. I Kvam foreslår ein å avvikla tenestestaden i Samnanger.

I Hardanger bur 68 prosent av befolkninga i tettstaden (Kvinnherad har 64). I Kvam bur 59 prosent av befolkninga i tettstader (Fusa og Tysnes har 23 prosent). I Os bor 85 prosent av befolkninga i tettstaden (Austevoll har 38 prosent).

- Driftseininga oppfyller måla med reforma og vilkåra for tenestestader og tenesteeiningar. Politidekninga er 0,94, oppsummerer "Forslaget".

Alternativet i Sør

"Alternativet" føreslår å splitta opp GDE`en i sør i to. Årsaka er at Voss organisatorisk vert knytta til Hardangerregionen. Det vert føreslått å oppretta ei ny sør-aust driftseining med Voss, Hardanger og Kvinnherad som tenesteeiningar. Kvinnherad endrar status frå tenestestad til tenesteeining. GDE`en får 46.217 innbyggarar. Vidare vert det oppretta ei ny sør driftseining med Os, Tysnes og Kvam som tenesteeinigar. Tysnes endrar i så fall status frå tenestestad til tenesteeining. Denne GDE`en får 42.451 innbyggarar.

Tilrådinga med både "Forslaget" og "Alternativet" er no levert til politimeisteren i Vest politidistrikt og vert lagd fram for styringsgruppa 5. oktober. Politimeisteren vil deretter senda sitt forslag ut på ordinær, seks vekers høyringsrunde frå 14.oktober.

Fristen for tilbakemelding for denne høyringa er 1. desember.

Politimeisteren vil innan 15. desember senda sitt endelege forslag til struktur på tenestestader og tenesteiningar til politidirektøren.