«Det store blå»: Vurderer dei ulike lokasjonane i løpet av hausten
Os er éin av 12 kommunar som har vist interesse for å husa REV Oceans «Verdenshavets hovedkontor». I løpet av hausten vert kommunane som er mest aktuelle, plukka ut.
I slutten av mars var ordførar i Os, Terje Søviknes (Frp), i lag med Lyseparken-direktør Fredrik Seliussen, i møte med administrerande direktør i REV Ocean, Nina Jensen, og kommunikasjonsdirketør i FP Eiendom AS, Marianne Stigset, for å presentera Lyseparken-konseptet, og mogelegheitene for å plassera «Verdenshavets hovedkontor», eller «Store Blå» som det vel 200 meter høge bygget også har blitt kalla, i næringsområdet.
Av ein oppdatering, sendt ut av Stigset 31. juli, går det fram at verksemdene, sidan april, har hatt møte med representantar for 12 ulike kommunar. I tillegg er dei i dialog med ein utanlandsk interessent.
Artikkelen held fram under annonsen.
– Vi ventar å ha ytterlegare møte med eit par kommunar etter fellesferien, og vil deretter vurdera dei mest aktuelle lokasjonane opp mot kvarandre i løpet av hausten, skriv Stigset.
Oppfølgingsmøte
Av kriteria ein kjem til å leggja vekt på i vurderinga, er:
• Nærleik til relevante kompetanse- og fagmiljø.
• Evne til å tiltrekkja seg kloke hovud.
• Nærleik til knutepunkt og gode kollektivsamband.
• Politisk støtte og engasjement for prosjektet.
• Politisk vilje til å løysa miljøproblem i havet, og skapa nye mogelegheiter for havrelaterte næringar, forankra i ein tydeleg miljøstrategi.
• Mogelegheit til å føra opp byggjet utan å beslagleggja urørt natur og med så lågt miljøavtrykk som mogleg.
Artikkelen held fram under annonsen.
• Nærleik til Aker-selskap.
• Nærleik til sjø og djupvasskai.
I løpet av utgangen av året kjem REV Ocean og FP Eiendom AS å be om oppfølgingsmøte ned dei mest aktuelle kommunane.
– Dersom kommunen dykkar ikkje vert valt til lokasjon for «Verdenshavets hovedkontor», utelukkar ikkje det mogelegheita for eit framtidig samarbeid, understrekar Stigset.
Kva skal bygget innehalda?
Parallelt med utgreiinga av kvar bygget skal plasserast, vert det arbeidd med å vidareutvikla kva bygget skal innehalda.
– Vi er i dialog med fleire havrelaterte forskningsmiljø, ideelle organisasjonar, internasjonale organisasjonar og filantropiske miljø. Dei konkrete planane vert offentleggjorte i september, går det fram av brevet.
Vidare går det fram at BI-professor Torger Reve får ansvaret for å byggja opp eit innovativt økosystem beståande av entreprenører, næringsklynger og industri, offentlege aktørar, forskning og utvikling, samt risikokapital som «Verdenshavets hovedkontor» skal vera i sentrum for.
– Dette vil bli utført i tett samarbeid med eksisterande næringsklynger, lokalt næringsliv og politikarar i området der havsenteret vert etablert, skriv Stigset.
Artikkelen held fram under annonsen.
camilla.kvamme@osogfusa.no
