Dømd for køyring i rusa tilstand

Fusingen som i oktober blei tatt med 0,99 promille då han køyrde bil, har no fått dommen.

Tidleg søndag morgon 22. oktober blei ein fusing i 20-åra stoppa på Osvegen i Bergen. Blodprøve teke av han same morgon, kring klokka 08.00, viste ein alkoholkonsentrasjon på 0,99 promille. Sikta har tilstått forholdet. Påtalemakta foreslo at straffa blei sett til vilkårsbunde fengsel i 15 dagar, 60.000 kroner i bot og tap av førarretten i eitt år og åtte månader.

Mannen i 20-åra blei dømd til fengsel i 15 dagar på vilkår med ei prøvetid på to år. Han er også dømt til å betala ein bot på 52.500 kroner, subsidiært fengsel i 15 dagar. Fusingen mistar også førarkortet i 20 månader. Som vilkår for gjenerverv av førarretten må han avleggja full ny førarprøve. Domfelte erklærte at han vedtok dommen i tingretten.