- Ein gåvepakke

Samstemte politikarar understreka kor viktig det er at Åsen-Helleskaret vert realisert.

Jostein Halland

jostein@osogfusa.no

- Dette er ein gåvepakke, sa utflytta lysefjording Tone Hepsøe (Ap), og såg fram til at Lyseklostervegen skulle få avlasting.

- Dette vil mellom anna betra tryggleiken langs skulevegen for mange born i området, og er såleis eit spørsmål om liv og helse, sa Hepsøe.

Knekt ei nøtt

Nils-Anders Nøttseter (MDG) skrytte av administrasjonen og ordføraren for å ha knekt ei nøtt i uvanleg mange positive delar.

Partikollega Helge Steinum omtalte prosjektet som "veldig bra", men ville vita om kommunen kan driva butikk på vegutbygging, og om det kunne vera aktuelt å starta eit vegselskap.

- Me kan tena pengar på vegutbygging. Det har Fylkesmannen stadfesta, kunne rådmannen opplysa.

Jostein Bondevik (KrF) trekte fram at ein no har eit tidsvindu til å få realisert dette prosjektet, som på sikt kan resultera i ein veg vidare mot Drange og Hildershavn.

Sit litt langt inne

Marie Bruarøy (H) var samd i at dette er ein gåvepakke, men mest av alt for fylkeskommunen.

- Det sit litt langt inne at grunneigarar og kommunen skal gå inn å ta 2/3-delar av prosjektkostnaden. Men dette er eit godt prosjekt for oss også, og kan vera starten på ringvegen som Jostein Bondevik trekte fram, vidare til Drange og Hildershavn, med påkopling til ny E39.

Varaordføraren understreka at eit eventuelt overskot for kommunen sin del må koma innbyggjarane til gode når den tid kjem.

Glenn Erik Haugland (V) rosa administrasjonen og ordførar Terje Søviknes for arbeidet med forskotteringa, og var positiv til prosjektet.

Han la likevel til at han har fått innspel om at dette er eit rekreasjonsområde med rikt dyreliv, og etterlyste svar på kor utsett dette området er.

Stor eigeninteresse

Terje Søviknes kommenterte at kommunen kunne vald "å lena seg attende å seia at dette kjem når det kjem", men påpeika at kommunen har stor eigeninteresse i at denne fylkesvegarmen vert bygd.

- Grunneigarane har på si side vore eintydig positive i denne prosessen, og me har fått få reaksjonar på summen på 40.000 kroner per bueining. Men det er nokre spørsmål knytt til kor mange einingar ein til slutt endar opp med her, sa Terje Søviknes i kommunestyret.

Med 2.000 bueiningar kan kommunen få att heile 80 millionar kroner av ei forskottering på 34,1 millionar.

- Dette er uforholdsmessig mykje, og må verta del av den vidare konkretiseringa av korleis finansieringa skal løysast,

Han understreka også at 2.000 bueiningar i seg sjølv vil bringa spørsmål på banen om både naturvernoppsyn, landskap, topografi m.m.

Søviknes la til at det i den vidare prosessen vert viktig å halda det reint planmessige og finanseringa adskilt.

- Me skal ikkje leggja økonomisk press på utbyggjarane frå kommunen si side, presiserte Søviknes.

Han la til at det kan vera interessant for kommunen å få på plass ein refusjonsrett overfor fylkeskommunen, med tanke på framtidige tilknytingar til vegen.