Ein stor mann er gått bort
Med bortgangen av John Lepsøy har Os mista ein stor mann i dobbelt forstand.
Fredag melde Midtsiden at John Lepsøy hadde gått bort etter nokre månaders sjukdom. Os & Fusaposten hadde i ei årrekkje eit tett og godt samarbeid med denne bautaen av ein kar. Keeperen frå Kuventræ, meisteren i all slags kastøvingar, ismålaren, lokalpatrioten og ikkje minst sprekingen som alltid stilte opp om hans krefter var ønskt, anten det var for skjemt eller alvor.
Underteikna hadde sist med John å gjera i vår då me i lokalavisa ønskte å laga ein aprilspøk om at ein for å spara pengar på gangbru under Osbrua, heller kunne engasjera eldre, lokale, sterke Oselvar-roarar til å frakta gåande frå hamnesida til promenaden på innsida av brua.
Artikkelen held fram under annonsen.
Lepsøy stussa sjølvsagt ikkje eit sekund. Sjølv om oppdraget dukka opp i seinaste laget, stilte han dagen etter med kona som sekundant. Med seg hadde han to kompisar og alle roarane var kledde som nostalgiske gondolistar, klare for innsats.
John Lepsøy vart 88 år. Han var ein stor mann i dobbelt forstand. Han var stor og sterk, men han hadde også eit stort hjarte for andre menneske og for bygda han levde i. Os har mista ein stor mann.
Våre tankar går til familien hans, kona Margun og hans tre born.
Kvil i fred.
Kenneth Svenningsen
