Eldsjela Tove har samla inn totalt ein halv million kroner til Bring Children From Streets

I snart ti år har Tove Tvedt Skarstein samla inn pengar til stiftinga Bring Children From Streets. Det har resultert i om lag 500.000 kroner. I februar reiser ho saman med dottera Synnøve til Uganda for å sjå det viktige arbeidet stiftinga gjer.

Det er skrivande stund ti dagar sidan Tove la ut ei melding på Facebook, der ho fortalde at ho og Synnøve skulle til Uganda, og at ho håpte at vener og kjende ville bidra med nokre kroner, slik at dei kan kjøpa mellom anna sko, skulemateriell og medisinsk materiell til Nsumba barneheim og skuleborn i Katangaslummen. Så langt har det kome inn 30.000 kroner.

– Det har vore ein heilt utruleg respons. Eg har prøvd å senda takkemeldingar til kvar enkelt, seier Tove.

Har jobba som lege i Kenya

Tove trefte mannen bak Bring Children From Streets (BCFS), Richard Kiwanuka, då ho var på Utøya på ein ungdomsleir i regi av New Page sommaren 2008.

– Det var då det starta. Eg blei inspirert av han. Sidan har vi hatt mange små og store innsamlingsaksjonar, som til dømes Hjartevarme og gjevarglede som blei arrangert sist i desember, seier Tove.

Kiwanuka kom frå Uganda til Noreg i 1995, 16 år gamal og foreldrelaus. Han gløymde likevel ikkje folket og landet han reiste frå, og frå Noreg har han vore med på å redda tusenvis av ugandiske born frå eit liv på gata. Det er dette arbeidet Tove og Synnøve snart skal få førstehands kjennskap til.

– Det verkar som at organisasjonen er veldig fokusert på å investera i framtida. Dei får born i skule og legg til rette vidare for dei i livet. Det er ein veldriven organisasjon, seier Synnøve, som er utdanna lege.

– Det blir spanande å sjå korleis systemet er bygd i Uganda. Det er utruleg forskjellig frå land til land i Afrika, og veldig ulikt Noreg, kor vi har alt, seier Synnøve, som tidlegare har jobba i Nairobi i Kenya.

– Det var før eg blei mor. Eg trur opplevinga vil bli annleis denne gongen.

Drøymde om å starta u-land-prosjekt

Det blir kanskje litt tid til sightseeing også, men det er ikkje noko mor og dotter har tenkt så mykje på.

– Det blir kjekt å koma til eit nytt land. Eg har høyrd at det er eit flott land. Vi har i grunn berre kjøpt billettar og teke vaksine. Vi har reist mykje i lag før, og plar ta ting litt som det kjem. Det går som regel veldig fint, seier Synnøve.

Det dei veit, er at dei skal vera ei langhelg på barneheimen, og at dei skal vitja prosjekta til BCFS i Katangaslummen. Tove gler seg stort til reisa.

– Då eg blei 50 år, stod det mellom billett til Uganda eller å reisa til Sør-Afrika og vitja familien som Synnøve budde hos i eitt år. Det blei sistnemnde. Då eg fekk førespurnad frå stiftinga om eg ønskte å vera med når dei skulle reisa i februar, var eg ikkje vond å be. Eg tok kontakt med Synnøve med ein gong og spurte om ikkje ho ville vera med, seier Tove.

Synnøve ønskte veldig gjerne å vera med. Ho fekk klarsignal frå sambuaren, som skal vera heime med dei tre borna medan dei er vekke, og frå jobben.

– Då Synnøve starta på legestudiet, spøkte vi ofte om at då ho var ferdig utdanna, skulle vi reisa, og starta eit u-land-prosjekt. Men så fekk ho så mange ungar, seier Tove og ler.

– Dette får bli lightvarianten.

Alt hjelper

Nyleg etterlyste Tove koffertar og baggar som dei kan fylla opp og ta med seg. Koffertar har dei alt fått på plass.

– Det kom ei kvinne inn i butikken for eit par dagar sidan med ein heilt ny koffert. Vi har også fått nokre fotballar. Vi kjem til å ta med oss ein del utstyr, men det meste blir kjøpt i Uganda.

– Det er fordi det er meir praktisk, og ikkje minst fordi vi får mykje meir for pengane der, seier Synnøve.

– Jobben vi gjer er nok berre ei dråpe i havet, men det gjer ein skilnad for nokon. Ein må tenkja slik at ein kan ikkje hjelpa alle, men ein kan i det minste hjelpa nokon, seier Tove, og legg til:

– Vi har fått inn mykje så langt - både pengar, leikar og utstyr, men det er berre til å halda fram med å gje.

Fakta - Stiftelsen Bring Children From Streets, Norway

Etablert på initiativ fra Richard Kiwanuka

Hovudkontor i Bergen

Målet er å støtta arbeidet til Bring Children From Streets, Uganda i form av:

• Økonomisk støtte til Nsumba barnehjem, opprusting og vedlikehald

• Etablera barnebyen JaJa Nsumba B. Children Village.

• Stimulera til anna utviklingsarbeid bl.a. gjennom bruk av idrett