Færre får hostevirus og korona for tida
Førekomsten av influensa har vore stabil dei siste par vekene. Samtidig har talet på RS-virusinfeksjonar flata ut, og koronabølgja i vinter er så å seia over.
Influensaaktiviteten er stabil etter at ein ganske moderat topp vart passert i jula, heiter det i Folkehelseinstituttets vekerapport om covid-19, influensa og andre luftvegsinfeksjonar.
Vidare ventar FHI at vinterferieperioden vil føra til nedgang i influensasmitten framover.
Artikkelen held fram under annonsen.
Talet på nye influensainnleggingar er stabilt med 225 innleggingar i veke 6 etter 234 i veke 5. Det var seks nye innleggingar i intensivavdeling med influensa i veke 6 etter ti i veke 5.
RS-virusinfeksjonar, som ofte rammar barn, er ikkje lenger aukande. I veke 6 var det 185 nye innleggingar etter 241 veka før.
Innleggingar av koronasmitta har gått ned sidan veke 50 med 76 nye i veke 6, etter 117 i veke 5. FHI skriv at vinterbølgja så å seia er over.
– Smittevernråda er å halda seg heime ved nyoppstått luftvegssymptom dersom ein kjenner seg sjuk. Alle bør også praktisera god hand- og hostehygiene, skriv FHI i rapporten.
Dei rår også personar som er ekstra utsette for alvorleg sjukdom, om å vurdera å bruka munnbind innandørs i det offentlege rommet i periodar med mykje smitte.