Fokus på ungdomstida: Os Turn leiger Oseana og hentar inn profilert NRK-programleiar

— Me ønskjer at elevane ved Os ungdomsskule skal få ein skikkeleg fin dag til å fokusera på ungdomstida og haldningar.

Det seier styreleiar i Os Turn, Gustav Bøe. Han håpar og trur ei slik samling vil vera nyttig for elevane ved ungdomsskulen i Os sentrum.

— Me har eit bakteppe med ein lei knivepisode i sentrum og får stadig høyra om at terskelen for å bruka narkotika vert lågare. I lys av dette ønskjer me at ungdomen skal få litt input om haldningsarbeid, om det å vera ung generelt og kva konsekvensar ulike vegval kan føra til, seier Bøe.

Arrangementet er utelukkande for elevar ved Os ungdomsskule og finn stad tysdag 30. april i skuletida.

Var positiv med ein gong

Bøe fortel at konseptet er inspirert av det Nore Neset IL gjorde då dei hyra inn Claus Lundekvam for eit par veker sidan.

Hovudgjesten i Oseana vert Leo Ajkic.

— Me ønskte å ha ein foredragshaldar som elevane kan identifisera seg med. Leo er godt kjent for dei unge og me er veldig glade for å få ham med oss på dette arrangementet.

Som ein del av programmet blir det også ein paneldebatt.

— Her har me ikkje alt klart enno, men me vil ha med oss politiet, forhåpentlegvis med Morten Haugland som jobbar mykje med ungdom. Me vil også ha med oss SLT-koordinator Elin Tuft, ungdomsrådet ved Mathilde Nonås og ein representant frå skulen, kanskje rektor om det skulle passa.

— Kvifor er det utelukkande for Os ungdomsskule?

— Me kunne sjølvsagt ønskt å arrangera for fleire, men no har me klint til og leigd Oseana-hallen, og sjølv om den er stor, er det avgrensa kor mange det er plass til, konstaterer Bøe.