Frontar utelivstilbod for eldre
Kafè Engeline startar med seniordans om laurdagane.
– Det er heilt sikkert mange eldre i Os som kunne tenkja seg å gå ut, om det berre var eit passande tilbod for denne aldersgruppa, seier Rune Solberg.
Han synest det er for gale at det ikkje finst eit slikt tilbod, og har no tenkt å gjera noko med det.
Artikkelen held fram under annonsen.
– Me startar opp med seniordans frå og med førstkomande laurdag. Tanken er dans og sosial samankomst for folk over 60 år, frå tidleg kveld i våre lokale, fortel Solberg.
Populært konsept
Platesnurraren og quizmasteren på Engeline har budd mykje rundt omkring i Noreg. Ideen til det nye konseptet fekk han frå vener og kjente i Oslo.
– I hovudstaden har dei såkalla ”Te-dans-arrangement” på ulike utestader i sentrum. Dette er blitt veldig populært. Ettersom utefolket i Os bruker å venta til seint på natt før dei dreg til sentrum, fann me ut at eldre i bygda kan få kvelden for seg sjølve, før me opnar opp for vanleg utelivskveld i lokala, seier Solberg.
Nok av musikk
Den siste tida har underteikna sett fleire døme på at den eldre garde i bygda er glad i dans. Både på eldresenteret og i samband med Os Fotball sitt arrangement i Tropehagen på Luranetunet.
Rune Solberg kjenner til interessa.
– Me kjem til å ta kontakt med eldresenteret og fortelja om opplegget vårt. Heilt klart.
– Og rett type musikk har du klar?
– Ja, i bøtter og spann. Svensk-topp, gamalpop, Roger Whittaker. Eg har alt. Og treng eg noko meir, kan eg berre ta turen til mine eigne foreldre i Kuvågen. Dei veit kva denne aldersgruppa vil lika, ler Solberg
Artikkelen held fram under annonsen.
Lågare volum
Seniordans-arrangementa vil skilja seg ein god del frå dei andre kveldskonseptea.
– Hovudpoenget er at dei eldre skal trivst og føla at atmosfæra er behageleg. Volumet på stereoanlegget vil i så måte tilpassast publikum og ikkje omvendt. Dessutan blir det sjølvsagt viktig å leggja til rette for både dans og sosial hygge rundt borda, slår Solberg fast.
kenneth.svenningsen@osogfusa.no
