Full stans i bygginga av fleirbrukshallen

Grunna fare for setningsskadar er arbeidet med fleirbrukshallen i Fusa utsett på ubestemt tid.

Etter planen skulle Hugaas entreprenør starta arbeidet med stålkonstruksjonane til bygget like etter påske. No er alt vidare arbeid sett på vent.

– Det er dessverre ting som tyder på at grunnen, trass i omfattande masseutskifting, ikkje er stabil nok til å bera tyngda av den massive stålkonstruksjonen som dette bygget må ha, seier prosjektleiar for Fusa kommune, Øysten Havsgård.

Med tanke på så lang tid det har teke å få dette prosjektet i gang, er han svært lei seg for at det nok ein gong blir utsetjing og venting.

– Det var jo meininga at dette huset skulle stå ferdig i november. No får me i beste fall håpa at me rekk å føra opp huset innan utgangen av 2019

Leiger inn grunn-konsulent

Det var i samband med siste del av fundamenteringsarbeidet denne veka at arbeidarane i underentreprenøren Berge entreprenør gjorde oppdaginga som fekk alle varsellampane til å lysa raudt.

– Av ein eller annan grunn har ein ikkje sett tendensen til dette før, men då halve beltehjulet til ei gravemaskin plutseleg seig nær meteren ned i grunnen like ved betongplattforma til ei av stålsøylene, skjønte ein at grunnen ikkje var trygg, seier Havsgård.

Fusa kommune har no kontakta ein grunnkonsulent til å koma på synfaring snarast mogleg.

– Me har vore i kontakt med grunnkonsulent Dagrunn Hammer i Grunn og bunn AS. Dei har måleutstyr og analysekalkulator-system for å scanna grunnen i området. Er me heldige slepp me kanskje unna med ei ny og djupare masseutskifting. I verste fall må me finna ny plass for fleirbrukshallen, seier prosjektleiaren.

Vurderer å flytta hallen

Ettersom Fusa kommune frå og med 2020 vil inngå i Bjørnefjorden kommune, har det vore diskutert om fleirbrukshallen eventuelt burde vore flytta til hovudsetet for idrett i den nye kommunen, nemleg Kuventræ i Os.

Ordførar i Os, Marie Bruarøy, helsar dette forslaget velkoment.

– Innan sommaren har me fått opp ein ny dobbelhall på Kvuentræ. I så måte hadde det passa fint om me også fekk ein fleirbrukshall i tilknyting til denne. Me har både tomt og plass til ein slik hall, og fusingane er sjølvsagt hjarteleg velkomne til å bruka anlegget så mykje dei vil, seier ordførar i Os kommune, Marie Bruarøy.

kenneth.svenningsen@osogfusa.no