Fylkeskommunen snur: Os og Fusa får vera med på oppvaskmøte om ferjene

På tysdag kom det fram at Fylkeskommunen ønskte å møta Austevoll kommune åleine til møte om problematikk knytt til ustabile ferjer. No blir møtet opna for fleire.

Tysdagmelde Os og Fusaposten at Fylkeskommunen ikkje ønskte fleire enn Austevoll-ordførar Morten Storebø på møtet om ustabile ferjer. Dette er eit problem i øy-kommunen i vest, men også for dei andre kommunane kring Bjørnefjorden. I tillegg skulle dei varsla nedgangen i ferje-avgangar drøftast på møtet.

Trudde det var unikt Austevoll-problem

I formannskapet tysdag vart problemstillinga drøfta og det vart vedteke at Os kommune skulle ta ein ny kontakt opp mot fylkeskommunen. Fredag kunne Marie Bruarøy fortelja at fylkeskommunen har ombestemt seg.

– Eg snakka nettopp med fungerande Fylkesordførar Pål Kårbø. Han vedgjekk at fylkeskommunen hadde feilvurdert situasjonen. Dei trudde at det eksisterte utfordrinar berre i Austevoll, fortel Marie Bruarøy.

Os-ordføraren kunne sjølvsagt orientera om at dette ikkje er tilfelle, og no blir det lagt opp til eit fellesmøte i staden. Både Os, Fusa og Tysnes får vera med på møtet som ein vil prøva å få til før sommarferien.

ol@osogfusa.no