Gunnar Nagell Dahl er gått bort

Meisterkokk, eldsjel og lokalmat-entusiast Gunnar Nagell Dahl er gått bort.

Nagell Dahl vart funnen død i sin eigen heim 3. juni. Han vart 66 år gamal.

Nagell Dahl var opphavleg frå Stord, men har budd på Os dei vel 30 siste åra.

Han var matattaché i nær 20 år, og hadde bakgrunn som kokk, stuert, kjøkkensjef og produktutviklar.

Lokalt i Os vart han tidleg engasjert og vart mellom anna sjef for Osøren Blues og Jazzfestival. 

Han var i si tid styremedlem i Norges Kokkemesteres Landsforening og var medforfattar til bøkene Matgleder fra Hordaland. Han vart teken opp som æresmedlem i Nordic Chefs Association og blei nytta som rådgjevar i næringsutvikling for lokal matproduksjon.

Han var også mannen bak Bergen matfestival - lokalmatfestivalen som blei arrangert for første gong i 2000. I tillegg var han også med i styret for Bergen Ølfestival og styreleiar i Slowfood Bergen.

Nagell Dahl engasjerte seg svært i lokal mat og kortreiste råvarer og var ein heilt sentral bidragsytar til Bjørnafjorden Matkultur og Det store Bjørnafjorden-måltidet.

Bjørnafjorden Matkultur takkar på sine nettsider for alt han har gjort for matkulturen i Noreg og Bjørnafjorden.

- En venn, samarbeidspartner, inspirasjon og mentor. Våre tanker går til nærmeste familie. Du er dypt savnet, Gunnar Nagell Dahl, skriv dei. 

Dei siste par åra jobba han blant anna med firmaet «Chefs Dinner Norge», i lag med mellom andre Torstein Hatlevik ved Haaheim Gaard.