Har fått opp skilt: Rår born og unge til å vera forsiktige
Denne veka kom dei første skilta om dei djupe myrhola opp ved Nore Neset idrettsplass.
Etter litt att og fram vart det klart at Nore Neset IL var blant eigarane av myrområdet med dei store myrhola nord-vest for idrettsanlegget på Nore Neset.
No har idrettslaget teke affære.
Artikkelen held fram under annonsen.
– Me meiner det er viktig å ta ansvar for å opplysa om at det finst myrhol som kan vera djupe og farlege. Difor har me no fått opp tre skilt, seier dagleg leiar i Nore Neset IL, Eirik André Hesthamar.
Han legg til at dei har brukt lokale Lator skilt til oppdraget.
Saka kom opp tidleg i haust då vaksne brukarar av radiobil-banen oppdaga at nokre av myrhola i dette området var heile to meter djupe.
Sidan var Erik Walden frå Bjørnafjorden brann- og redning på befaring der. Han var klar på at det i alle fall var på sin plass å få opp skilt.
– No har frosten sleppt, og dei første skilta er på plass, kommenterer Hesthamar.
Han utelukkar ikkje at dei også vil gjera meir for å sikra myrhola i tida som kjem.