Helseministeren kjem til opninga av nytt kjøken: - Ein jubeldag for Bjørnafjorden
Helseminister Ingvild Kjerkol (Ap) besøker Bjørnafjorden kommune og Luranetunet bu- og behandlingssenter.
Onsdag er det duka for offisiell opning av det nye kjøkenet på Luranetunet.
Statsråden skal stå for opninga, og vil i tillegg få informasjon om korleis den nye kjøkkenløysinga fungerer.
Artikkelen held fram under annonsen.
Kjerkol vil òg få høyra om Bjørnafjorden-modellen - Bjørnafjorden kommune si ordning for å rekruttera fastlegar midt i den nasjonale fastlegekrisa.
Det opplyser kommunen på sine heimesider.
Bjørnafjorden-modellen
* Ekstra kommunalt basistilskot
Kommunen betaler ekstra basistilskot kr 325,- per pasient (opp til 1.000 pasientar), som kjem i tillegg til det statlege basistilskotet på kr 675,-
* Ekstra årleg driftstilskot
50 000,- øyremerkt investeringar, for eksempel inventar og medisinsk utstyr.
* Moglegheit for reduserte pasientlister
800-900 pasientar, om du ønskjer det.
* Gjenkjøpsgaranti av fastlegeheimel
Om du vil avvikla i løpet av dei tre første åra, kjøper kommunen tilbake heimelen.
* Dekking av praksisutgifter ved behov for vikar
* Oppstartsgaranti for null-heimlar
Kommunen dekker basistilskot opp til 600 pasientar i inntil 12 månader + gjenkjøp av utstyr (inkludert fellesutstyr) ved kontoret dersom du avviklar i løpet av dei tre første åra.
* 60 % kompensasjon ved sjukefråvær for barn under 12 år i inntil 10 dagar per år. For ALIS-legar også ved eigen sjukdom.
* Fastlønn for legevakt
* Insentivlønn for legevakt for kommunale fastlegar
Vilkår for ALIS/LIS1
* Rettleiing og individuell utdanningsplan tilsvarande krava i spesialistforskrifta.
* ALIS-ordninga dekker praksiskompensasjon ved fråvær frå fastlegepraksis i samband med læringsaktivitetar og rettleiing, inkludert førebuing
* 60 % kompensasjon ved sjukefråvær for deg/barn under 12 år i inntil 10 dagar per år (fram til sjukeavbrotsforsikring gjeld).
* Kommunen dekker utgiftene til læringsaktivitetar som ikkje blir dekte av Legeforeningen.
* Eigen kommunal ALIS-/LIS1-koordinator.
Kjelde: Bjørnafjorden kommune
– Eg begynte å jobba for kjøkenløysinga som opposisjonspolitikar i 2015. Det er ei stor glede at vi i posisjon i Bjørnafjorden endeleg har fått dette til - både for dei eldre og for dei tilsette, seier ordførar Trine Lindborg (Ap) til nettsida.
– No kan vi bruka kompetansen og ressursane rett. Vi får betre matomsorg samstundes som vi frigir meir tid til pleie. Dette er ein jubeldag for Bjørnafjorden, og ekstra stas at helseministeren kjem til oss for å sjå på våre løysingar, seier Lindborg vidare.
Produksjonskjøkkenet ved Fusa bu- og behandlingssenter (FBBS) lagar no middagar for både eigne bebuarar, bebuarane på Luranetunet, brukarane av dagsentera og heimebuande som får middag levert på døra.
– I tillegg har både Luranetunet og FBBS tillagingskjøkken. Her lagar matfagleg tilsette til maten for servering. Dei lagar òg dei delane av måltidet som ikkje er eigna til oppvarming, som til dømes kokt fisk og grønsaker, forklarer kommunen i saka på nettsida si.
– Denne kjøkkenløysinga er nøkkelen til auka kvalitet på maten, meiner serviceleiar på Luranetunet, Øystein Grytøyr, som òg har fagbrev som kokk.
Artikkelen held fram under annonsen.
- God matomsorg er viktig for trivsel og for å førebyggja og behandla feil- og underernæring. Målet med den nye kjøkkenløysinga er å gi gode opplevingar ved måltidet, større matglede og valfridom for alle brukargruppene våre, seier Grytøyr.
