I konflikt med sikringssona?

Os kommune bed grannane i Fusa om å sjekka om eit nytt område for akvakultur utanfor Skåtholmen er i konflikt med sikringssona til Oselva.

I ein merknad til den nye arealplanen i Fusa, peikar Os kommune på at det kan sjå ut som om delar av området som er sett av til akvakultur utanfor Skåtholmen, ligg innanfor sikringssona til Oselva.

- I Os kommune sin arealplan er det lagt inn eit stort sikringsområde kring utløpet til Oselva. I dette området er det ikkje høve til å etablera akvakulturanlegg, skriv plansjef i Os, Asle Andås, i eit brev til Fusa kommune.

Sikringssona gjeld ikkje berre i Os. Sona strekkjer seg også inn i sjøområdet til Fusa kommune.

- Sikringssona er ikkje vist i arealplankartet til Fusa. Det er såleis vanskeleg å vurdera om det nye området for akvakultur er innanfor eller utanfor sona, men det kan sjå ut som om delar av området ligg innanfor, påpeikar Andås.

Den nye arealplanen til Fusa kommune har dei to siste månadane lege ute til høyring. Høyringsfristen gjekk ut 20. august.