Jobbar med å få heva båten

Mannen som eig båten som litt på 10-12-meters djup ved Moldavika har sendt brev til Os kommune.

I januar skreiv Os & Fusaposten om treskøyta som ligg på botn ved djupvasskaien ved Moldavika. Der har ho lege i halvtanna år, ifølgje brannsjef Stein Gjøsund, som i saka var klinkande klar på at skjergarden i Os ikkje skal vera ein gravplass for båtar.

Vil gjera nytt forsøk

Politiet skal ha vore i kontakt med eigaren av båten, som har lova å ordna opp, men ingenting har skjedd. No har kommunen purra på eigaren igjen, og fått svar.

– Eg vil berre opplysa om at det er gjort fleire forsøkt på å heva båten utan hell. Eg har no engasjert ein profesjonell dykkar til å gjera alt arbeidet under vatn. Eg har også med ein eigna båt med kran som skal ta seg av resten, skriv han.

Båteigaren skriv vidare at det må vera blikstille vatn for å kunna gjennomføra ein slik operasjon, og at dei har vore på staden mange gonger, men har måtta avbryta.

– Eg vil informera om at det snart er klart for eit nytt forsøk. Eg må verre venta til dykkaren har fri frå sin vanlege jobb, skriv han.