Jonas Grill opnar onsdag: Gav restauranten favorittnamnet

Om fire månadar ventar han vesle Jonas. Inntil vidare blir Jonas Grill Moustafa Khabbats hjartebarn.

Etter fire år på kjøkenet på Nesttun Kebab er Mustafa Khabbat klar for nye utfordringar. I morgon blir draumen hans om å driva eigen restaurant, verkelegheit.

– Eg har gledd meg lenge til dette. Me har jobba og stått på, og håpar dei som bur i Os vil lika tilbodet og restauranten vår, smiler Mustafa.

Han blir dagleg leiar i Jonas Grill. I tillegg får han 3-4 andre tilsette som skal jobba på kjøkenet og med utkøyring.

Diggar namnet

På spørsmål om kvifor han har vald å «døypa» restauranten for Jonas Grill, blir han ståande ei stund å leita etter orda, så bryt han ut i latter og kjem med følgjande:

– Fordi eg liker veldig godt det namnet. Om fire månader skal me få barn. Då skal me døypa barnet Jonas, legg han til.

– Har de bestemt dykk for det?

– Ja, det er bestemt.

Breitt utval

Dei har gjort ein god og omfattande jobb med å fornya lokala etter at Aroy Dee takka for seg og flytta ut for over eitt år sidan.

– Huseigar har gjort mykje, så har me gjort siste finish, seier Khabbat og peiker på dei hyggjelege tak-utstikka dei har laga til over spiseborda langs ved veggen.

– Det er jo ein del andre i Os som driv i restaurantbransjen. Kva tankar gjer du deg om konkurransesituasjonen?

– Me håpar og trur det er behov for alle restaurantane. Sjølv vil me prøva å selja oss inn med mange gode tilbod og breitt utval av rettar, seier Khabbat.

I tillegg til pizza og eit rikt utval kebab vil dei mellom anna servera såkalla «Pide» som ein kan få innbakt eller halvinnbakt.

kenneth.svenningsen@osogfusa.no