Kan Os ha løysinga på steinproblemet i Bergen?

I Bergen kommune er det omkamp om steinen frå utbygginga av E39 kan plasserast i Liavatnet. No vurderer styret for Lyseparken om det kan la seg gjera å plassera steinen i Endelausmarka.

Bergen kommune har trekt tilbake løyvet om å fylla 1 mill. kubikk stein frå E39-utbygginga mellom Svegatjørn og Rådal i Liavatnet. Statens Vegvesen aksepterer ikkje det nye vedtaket som gyldig. I formannskapet i Os i dag skisserte ordførar Terje Søviknes ei mogleg løysing på problemet.

Omrokkering av stein

- Dersom steinen som skulle ha vore plassert i Liavatnet heller blir plassert i Hordnesskogen, så kan steinen som skulle vore plassert i Hordnesskogen heller bli plassert i Endelausmarka, sa Terje Søviknes til medlemmene i formannskapet.

Styret i Lyseparken har drøfta denne saka, og alt no er Norconsult engasjert for å rekna på om det vil vera meir lønsamt for Os kommune å gjera det på den måten enn å følgja det frå før tenkte løpet med massedeponering i Lyseparken.

- Ta imot med opne armar

Dei andre politikarane var positive til tanken. Espen Aspenes (Frp) gav uttrykk for at gratis stein må takast i mot med opne armar.

- Stein har den eigenskapen at du må betala i dyre dommar for det når du treng det, men det er gratis når du ikkje treng det. Dersom me i neste omgang har eit problem med for mye stein, kan me heller knusa steinen og tena gode pengar på det, sa Aspenes.

Lars Atle Skorpen (Ap) lurte på korleis dette i det heile kunne oppstå som eit problem, og meinte det hadde med Statens Vegvesen si framferd.

- Først gjer dei Liavatnet til eit fint turområde, og deretter skal dei rasera alt saman? Dette har dei stelt i stand sjølv, sa Skorpen. Elles var han einig i at det var ein god idé Søviknes orienterte om.

Ordføraren korrigerte Skorpen med at Vegvesenet sjølv oppgjev at dei vil gjera området like fint att etter at deponeringa er overstått. Men i byggjefasen vert det sjølvsagt ikkje like tiltrekkjande som turområde som i dag.

Nokre skjær i sjøen

Elles la Søviknes til at det var nokre utfordringar med den føreslegne løysinga.

- Det vil vera ein kostnad ved transporten av steinen frå Hordnesskogen til Lyseparken. Det vil også gje tungtrafikk over Vallaheiane, med dei utfordringane det medfører, sa han.

Samtidig vil kostnadene med å utvikla Lyseparken i lys av dette koma tidlegare enn først tenkt.

- Kostnaden vil ikkje nødvendigvis bli større, men dei kan koma tidlegare. Det vil få konsekvensar for investeringsbudsjettet, sa Søviknes.

Det gjenstår å sjå kva Bergen kommune og Statens Vegvesen vil seia til eit slikt prosjekt. Saka vil koma opp att til politisk behandling i Os om det viser seg å falla i god jord.

- Me har i alle fall signalisert at dersom det skal nye forhandlingsrundar til om dette, skal me vera til stades ved bordet, sa Søviknes.