Konfirmanttur til Vinnesholmen: Tok sjøvegen til kyrkja på søndagen
Konfirmantane i Explore-guppa tok sjøvegen til kyrkja på søndag.
Fusa Sokn gjennomførte tradisjonen tru konfirmanttur for «Explore»-gruppa sist helg. Vinnesholmen Kystlag bistod for tredje året på rad.
Grunna dårleg ver i Bjørnafjorden måtte planane, som i utgangspunktet var ein tur til Solstråleøya på Tysnes, endrast. Gjengen slo leir på Vinnesholmen i staden og gjennomførte programmet der.
Artikkelen held fram under annonsen.
Her vart det både fisketur, barkebåt-konkurranse, motorbåt-køyring, armband-produksjon, konfirmantundervisning og førsthjelpsopplæring. På menyen stod mellom anna grilla pølser i lavvoen på toppen av Vinnesholmen. Serveringa stod presten for.
Overnattinga var i hytte på holmen og i seglbåtar i hamna.
Søndag seilte følgjet med kutteren til kystlaget, «Frimann», og tre havseglarar i formasjon mot Fusa kyrkje for gudsteneste.
- Undervegs oppstod det framdriftsproblem på den gamle kutteren vår og den blei liggjande utan motorkraft midt i mellom Vinnes og Fusa. Kriseløysing blei iverksett. Konfirmantar og bagasje vart overført frå Frimann og ein seglbåt til dei to siste seglbåtane som deretter fulllførte turen slik at konfirmantane rakk gudstenesta i Fusa kyrkje, fortel Roger Hoel i kyslaget.
Frimann blei deretter slept tilbake til Vinnes ved hjelp av ein seglbåt og fortøyd på plassen sin, og feilsøking blei påbegynt, ifølgje Hoel.
jostein@osogfusa.no
