Må ut med 12.100 kroner etter laserkontroll

Fleire førarar blei stoppa på Halhjemsvegen torsdag, då politiet gjennomførte laserkontroll.

Kontrollen blei utført i 12.40-tida torsdag ettermiddag i 70-sona på Halhjemsvegen.

Politioverbetjent Anne Lyssand ved Bjørnafjorden politistasjon opplyser i ein e-post at det blei skrive ut fem forenkla førelegg, og at føraren med høgast fart blei målt til 97 km/t.

Denne føraren må ut med heile 12.100 kroner og får tre prikkar på førarkortet sitt.

Kontroll på ferjekaien

Politiet gjennomførte også kontroll på Halhjem ferjekai torsdag. Under rus- og dokumentkontrollen blei 59 kontrollerte.

– Ingen reaksjonar, opplyser Lyssand.

Svindelforsøk

Torsdag fekk politiet også melding om eit svindelforsøk. Ei kvinne i 50-åra som skal ha vore til legen onsdag, skal torsdag ha blitt tilsend betalingslenke frå “Convene”.

— Denne viste seg å vera falsk, skriv Lyssand, som opplyser at kortet til meldar blei sperra og svindelforsøket stansa.