Dyr køyretur: Natt til laurdag måtte to bilførarar ut med kring 4.000 kroner kvar i bot etter ikkje å ha overhalde fartsgrensa. Foto: Arkiv

Målt til 97 kilometer i timen ved Liafjellstunnelen

Politiet merkjer godt at folk held seg heime for å hindra spreiing av koronaviruset, men nokre fartssyndarar er det framleis.

Natt til laurdag vart det gjennomført ei snittmåling, først ved Liafjellstunnelen, dernest i Byvegen.

– Ein bilførar vart målt til 97 kilometer i timen like ved påkøyringa til ny E39. Føraren fekk eit førelegg på 4.700 kroner og to prikkar i førarkortet. I Byvegen vart ein bilførar målt til 74 kilometer i timen i 60-sona. I dette tilfellet vart det eit førelegg på 3.800 kroner og to prikkar, opplyser vakthavande politibetjent ved Bjørnafjorden lensmannskontor.

Ikkje mistanke om rus

Like før klokka 14 laurdag vart det meldt om ei trafikkulukke på E39 på Halhjem. Føraren vart vaken og bevisst då politiet kom til staden.

– Trafikken vart dirigert forbi ulukkestaden, og bilførar og vitne til hendinga vart avhøyrte. Det er oppretta ei sak på forholdet, men det er ikkje mistanke om rus. Førarkortet til personen som køyrte ulukkesbilen vart heller ikkje inndrege, fortel politiet.

Natt til søndag har ikkje politipatruljen hatt så mykje å hengja fingrane i.

– Politiet, som veldig mange andre verksemder, merkjer at det er stille, seier vakthavande politibetjent.