Martine gjekk heilt til topps i U18 - Rein Lidenskap

Med solide 5.878 stemmer er freestyle-dansar Martine Blomberg suveren vinnar av U18 - Rein lidenskap.

U18 - Rein lidenskap har vore Os & Fusaposten si store ungdomssatsing i 2018. Med god hjelp av elevane ved valfaglina for media på Os ungdomsskule fekk me inn nær 100 forslag til kandidatar med lidenskap og talent på ulike felt før sommaren. Etter ein grundig gjennomgang av kandidatane, stod seks finalister att.

Enormt engasjement

Frå og med fredag 21. desember til 2. juledag kunne lesarane våre stemma på skyttaren Sofie Evensen frå Os, volleyballspelaren Terian Kaelo frå Strandvik, freestyle-dansaren Martine Blomberg frå Søfteland, norenesing og karatetalent Tuva Baggen, motocross-køyraren Mattias Eide frå Os og songaren Victoria Bakka frå Fusa. Engasjementet var enormt.

– 11.385 stemmer vitner om at folk har engasjert seg stort. Det er sjølvsagt veldig gledeleg. Ekstra kjekt er det når dette har vore ein konkurranse for og med ungdom, seier redaktør Jostein Halland.

Suveren siger

Av dei 11.385 stemmene gjekk heile 5.878 stemmer til Martine Blomberg. Nest flest stemmer fekk skyttaren Sofie Evensen med sine 2.881 stemmer. Tuva Baggen fekk tredje flest med 1.502 stemmer.

Tusen takk for engasjementet frå lesarane, tusen takk til alle som sendte inn bidrag og til ungdomsskuleelevane som henta inn bidrag og tusen takk til finalistane som har bidrege til seks flotte finalevideoar.

Lukke til vidare med lidenskapen dykkar, alle saman!

kenneth.svenningsen@osogfusa.no