Masseslagsmål var usemje

Klokka 11.30 meldte Hordaland politidistrikt om slagsmål mellom 8-10 personar på Halhjem ferjekai. Kort tid seinare kom kontrabeskjeden.

- Noko overdriven melding. Det heile bunner ut i usemje mellom to menn, skreiv Operasjonssentralen i Hordaland på Twitter litt før klokka tolv.

Den første meldinga var langt meir dramatisk: Slåstkamp på ferjekaien. Fleire patruljebilar på veg, lydde beskjeden.

- Då vi kom fram til staden, var situasjonen i det store og det heile over. To personar hadde vore i klammeri med kvarandre. Det viste seg at den eine, heilt uprovosert, hadde slått til den andre, opplyser operasjonsleiar Morten Kronen i Hordaland politidistrikt til «Os og Fusaposten».

- Vi held framleis på å nøsta opp i saka. Patruljen frå Os er framleis på staden. Det er ro og orden der no, seier Kronen.