– Mest av alt kjem me til å sakna dei tilsette
Laurdag er siste opningsdag for Rema 100 i Idrettsvegen.
Ragna Hodneland og Elsa Garvik har vore faste kundar i årevis. At butikken stengjar dørene, synest dei er veldig leit.
– Eg har budd like ved her i 12-13 år og har ikkje handla andre plassar. Hovudgrunnen er dei tilsette. Dei er altså så kjekke og greie. Eg kjem til å sakna dei veldig, seier Elsa.
Artikkelen held fram under annonsen.
Ragna er samd.
– Ja, dette er greie folk. Dei er alltid smilande og hjelpsame. Det er trist at me ikkje skal få sjå dei i butikken her lenger, seier ho.
I vinter fylte Elsa 81 år. Då fekk ho spesialhjelp av dei tilsette i butikken.
– Det var stålis og glatt ute, så dei skjønte nok at eg ville ha problem med å henta kaka eg hadde bestilt. Men likevel: At dei skulle koma på døra med kaka var meir enn ein kan ha lov å venta seg av travle folk, smiler Elsa.
Tunge dagar
Det er ikkje lett når ein brått får melding om at 29 års drift snart er historie.
For dei tilsette i Rema 1000-butikken i Idrettsvegen i Os kom avgjerda som julekvelden på kjerringa. Dei ante ingenting, før dei fekk melding om at butikken snart måtte tømast for innhald.
– Det er veldig trist, men det er ikkje noko me kan gjera. Avgjerda er teken. No må me tenkja framover, seier Lars Sigurd Hjertholm.
Han har jobba i butikken sidan han var 14 år. I dag er han 31.
Artikkelen held fram under annonsen.
– Eg har hatt over halve livet her. Det er klart det er tungt å sjå butikken stengja ned. Eg kjem til å sakna både kollegaer og kundar, seier 31-åringen.
Kjøpmann Ingunn Hope kjenner på det same.
– Trøysta får vera at me har fått veldig mange hyggjelege helsingar. Det er tydeleg at me har gjort ein god jobb for dei som har handla hos oss. No får me berre håpa at kundane dreg til Rema 1000 Kuven stasjon, i staden, seier Hope.
kenneth.svenningsen@osogfusa.no
