Nils-Petter Borge har fått ny jobb
Assisterande kommunedirektør Nils-Petter Borge går til stillinga som direktør i Etat for helsetenester i Bergen kommune.
– Eg har fått ei veldig spennande moglegheit innan fagfeltet som ligg hjartet mitt nærmast. Eg følte rett og slett at eg måtte takka ja til denne sjansen, seier Borge til kommunen sine nettsider.
I ei pressemelding frå Bergen kommune seier Borge at han «er stolt og audmjuk over å få denne moglegheita til å jobba med helsefeltet i Noregs nest største by. Eg gler meg til å bli betre kjent med tilsette og leiarar og utfordringsbiletet i etaten».
Artikkelen held fram under annonsen.
Han startar i den nye jobben 1. mai.
Nils-Petter Borge var rådmann i tidlegare Fusa kommune og kommunalsjef for helse og omsorg i Os kommune. Han er utdanna psykiatrisk sjukepleiar.
– Bjørnafjorden kommune mistar ein kapasitet og ein stor ressurs. Nils-Petter har bidratt i over 15 år, både som leiar på sjukeheimen, kommunalsjef i Os kommune, rådmann i Fusa kommune og no assisterande kommunedirektør i Bjørnafjorden kommune. Samstundes forstår eg valet han har tatt, og er sikker på at han vil gjera ein svært god jobb i ei spennande og utfordrande stilling. Eg ønskjer Nils-Petter lukke til, uttaler kommunedirektør i Bjørnafjorden kommune, Christian Fredrik Fotland.
Kjell Wolff, kommunaldirektør for Byrådsavdeling for eldre, helse og frivilligheit, seier dei er «veldig glade for å ha fått ein så erfaren leiar for ein etat som gjev svært viktige tenester til innbyggjarane i Bergen».
– Etaten har lagt bak seg ei krevjande tid og den nye etatsdirektøren vil saman med dei tilsette jobba med å finna ein god veg vidare, seier Wolff.
