Noregs Bank set opp styringsrenta 0,5 prosentpoeng
Styringsrenta blir sett opp 0,5 prosentpoeng frå 3,25 til 3,75 prosent, kunngjorde Noregs Bank torsdag. Truleg blir ho sett vidare opp i august.
Prisveksten er klart over målet. Lønnsveksten ser ut til å bli høgare enn i fjor. Aktiviteten er framleis høg og arbeidsmarknaden stram, men presset i norsk økonomi er i ferd med å minke, seier sentralbanksjef Ida Wolden Bache i ei pressemelding.
Komiteen for pengepolitikk og finansiell stabilitet meiner det er behov for ei høgare rente enn tidlegare signalisert for å føre inflasjonen ned til målet. Prisveksten har vore klart høgare enn anslått i førre rapport. Rentene ute har stige meir enn ein har lagt til grunn. Høgare lønnsvekst og ei svakare krone enn tidlegare vil bidra til å løfta prisveksten framover, heiter det.
Artikkelen held fram under annonsen.
– Dersom vi ikkje hevar renta, kan prisar og lønningar halda fram med å stiga raskt, og inflasjonen bita seg fast. Då kan det bli meir kostbart å få prisveksten ned igjen, seier Bache.
På førehand var økonomane delte i synet på om renta ville aukast 0,25 eller 0,5 prosentpoeng. Noregs Bank sette opp renta 0,25 prosentpoeng i mai, og varsla samtidig at ho truleg ville aukast meir i juni.