Nye lånekundar må tola åtte prosent rente

Nye lånekundar må greia å betala åtte prosent rente på låna sine for å innfri utlånsforskrifta. Kundane får mindre i lån enn for berre få månader sidan.

– Det er vanskelegare å få lån no fordi renta er mykje høgare. Når vi skal berekna kor mykje vi kan gi i lån, må vi bruke berekningsmodellane våre på ein annan måte, seier konserndirektør Ingjerd Spiten i DNB til NRK.

Utlånsforskrifta seier at bankane må testa kundane for å sjå om dei kan tola ein renteoppgang på tre prosentpoeng til på den samla gjelda si. Det betyr over åtte prosent for nye lån.

– Lånemoglegheita for ein heil familie har falle med rundt 300.000 kroner for ein familie som har ei samla inntekt på 1 million kroner, og det er ganske dramatisk når det gjeld kva moglegheit dei har til å finne ein eigna bustad, seier direktør Endre Jo Reite i BN Bank.