Planlegg ny restaurant i bankbygget
Os Næringspark AS har store planar for Brugata 6.
Os Næringspark AS, med Knut Jarle og Espen Aspenes i spissen, har no søkt om rammeløyve og mellombels dispensasjon og bruksendring for Brugata 6 (begge tidlegare DnB-bygg). Ansvarleg søkjar er ABO Plan og Arkitektur AS.
I planane inngår riving av det som vert omtala som mellombygget mellom "gamlebanken" og "nyebanken" og etablering av ny bru mellom bygga i 2. etasje med opning/gjennomgang på gateplan. Riving av delar av baldakin mot Brugata, endring av fasaden i andre etasje, ny uteplass i andre etasje mot sør, inngår også i planane. I tillegg kjem endring av innreiinga i 1. etasje der tiltakshavar har planar om å etablera restaurant.
Artikkelen held fram under annonsen.
Bygget er i dag regulert til forretningar og kontor i reguleringsplanen for Osøyro. Eigedomen vert no føreslege regulert til sentrumsføremål som omfattar bustader, handel, service, bevertning, overnatting, kontor, forretning eller annan sentrumsstetta verksemd.
1. etasje er kan nyttast til alle tillatne funksjonar unnateke bustad. 2. etasje kan nyttast til alle tillatne funksjonar. Forretningar og varehus vert berre tillate i 1. og 2. etasje, medan det frå 3.-5. etasje skal prioriterast tilrettelegging for bustad.
I søknaden vert det opplyst at store delar av bygningsmassen per i dag er disponibel for nye leigetakarar og det pågår arbeid for å få fylt bygget med nye verksemder så snart som råd.
Mellombels dispensasjon er ynskt fram til den pågåande detaljreguleringa for elvepromenaden for Oselva.
