Samla inn 325 middagar til Kirkens Bymisjon

Annleis Black Friday-markering i Os sentrum kan bli ein tradisjon. I staden for å ha tilbod, donerte fleire butikkar middagar til Kirkens Bymisjon.

Innehavar av Nordisk Rom, Katrine Heggland, var først ute med initiativet. Ho hadde bestemt seg for å donera middagar til Kirkens Bymisjon på Black Fridag (fredag som var, journ.mrk.), i staden for å ha tilbod på varer i butikken. Tove Tvedt Skarstein, med hennar tre butikkar Madam Ane, Yes! Vi leker og S. Tvedt AS følgde eksempelet, saman med Marianne Holmefjord i Os Blomsterservice.

- Det var mange som hadde fått med seg at vi hadde ein annan vri på Black Friday, seier Heggland og held fram:

- Eg hadde eit mål om å donera bort 50 middagar, og nådde det.

Støttar Kirkens Bymisjon også i åra som kjem

Butikkeigaren er nøgd med å ha nådd målet, og no håpar ho at dette kan bli ein tradisjon.

- Det var fleire butikkar i sentrum som gjorde som eg. I tillegg veit eg om fleire andre på ulike stader i Noreg som gjorde nokolunde det same. Det hadde vore kjekt om vi klarte å gjera dette til ein tradisjon, seier Heggland.

Marianne Holmefjord i Os Blomsterservice hadde på førehand bestemt seg å donera halvparten av dagsomsetnaden til Kirkens Bymisjon. Det blei heile 175 middagar.

- Neste år håpar eg at det blir endå fleire middagar. Dette var noko eg bestemte meg for for berre kort tid sidan. Om vi får spreidd ordet endå meir neste år, trur eg vi kan få til eit endå betre resultat, seier Holmefjord og legg til:

- Det er mange ein kan velja å støtta, men det er ikkje mogleg å støtta alle. Eg har valt Kirkens Bymisjon i år, og kjem til å støtta dei også i åra som kjem.

Kundane set pris på initiativet

Tove Tvedt Skarstein seier at det var ein hyggeleg handelsdag fredag. Vrien på Black Friday blei godt motteken av kundane, som kom innom eins ærend fordi dei hadde høyrt om sentrumsbutikkanes opplegg.

- Vi fekk mange hyggelege tilbakemeldingar frå folk som set pris på det vi gjorde. Eg veit om mange som av prinsipp ikkje handlar på Black Friday, og fleire som jobbar mot at Black Friday skal bli ein tradisjon i Noreg. Det vil vera mange ulike meiningar om denne dagen, og alle må ta sit val. Vi håpar i alle fall at måten vi har gjort det i år, kan bli ein tradisjon, seier Tove, som donerte 100 middagar til Kirkens Bymisjon.