Smakfulle bed: – Her blir det lovleg slang til sommaren
Nore Neset IL (NNIL) unnar bebuarar på Nore Neset ei smakfull oppleving neste sommar.
I samband med ferdigstillinga av Nore Neset Arena, padeltennisbanane, sykkelbanane og folkehelseparken, tok Nore Neset IL på seg å pynta opp langs vegen frå rundkøyringa på Nore Neset og inn mot ungdomsskulen. Beplantinga av den over 200 meter lange jordvollen mellom aktivitetshuset, den nye idrettshallen og bilvegen, er det Os Hageservice og Lyssand Gartneri som har teke seg av.
Dagleg leiar i NNIL, Eirik André Hesthamar, fortel.
Artikkelen held fram under annonsen.
– Dette er resultat av sponsorstøtte og godt samarbeid. Me ville lysa opp og gjera vegen inn mot ungdomsskulen og idrettsanlegget vårt litt trivelegare. Val av planter og grønt, er det Thomas Lyssand i Lyssand Gartneri som har stått for, seier Hesthamar.
– Heile feltet er proppa av jordbærplanter. Blir det fritt fram for slang neste sommar eller?
– Ja, me må vel seia det. Dette skal vera bed til glede for alle i området, så bæra må dei få smaka på, dei som vil, smiler Hesthamar.
Ein av dei største jordbærplantasjane
Thomas Lyssand ler godt når han får spørsmål om kvifor han valde jordbærplanter til beda langs vegen.
– Me tenkte me skulle gjera noko originalt og morosamt for borna i området. No blir jo NNIL eigar av ein av dei største jordbærplantasjen i Os, smiler Lyssand
– Kor mange jordbærplanter har de sett ned?
– Kring 500. Kvar av dei skal gje om lag eitt kilo jordbær, så om bæra får stå i fred til dei er modne neste sommar, blir det 500 kg tilgjengeleg langs ved vegen. Gratis for dei som måtte ha lyst på, fortel Lyssand.
– Er det andre grunnar til at de valde nett denne planten?
Artikkelen held fram under annonsen.
– Det er jo ein botndekkande plante som viser godt både vår, sommar og haust, fortel Lyssand.
Han legg til at dei også har planta ein del syrinhortensia-planter, slik at totalen blir ei fargerik og fin blanding.
