Sperrevik har fått tilbod om lensmannsstilling

Terje Sperrevik (55) frå Os rar vore lensmann i Kvam og Samnanger sidan 2013. No har han fått tilbod om stilinga som lensmann med funksjon som tenesteeiningsleiar ved Kvam, Fusa og Tysnes.

Sperrevik er utdanna politi og jurist.

Totalt 13 personar fekk denne veka tilbod om stillingar som lensmenn og seksjonsleiarar i Vest politidistrikt. I samband med politireforma vert alle leiarstillingar tilsett på ny, opplyser Arne Lutro, leiar for stab for kommunikasjon, i ei pressemelding.

Tilsetjingsråd i Vest politidistrikt hadde møte tysdag denne veka, der dei gjekk samrøystes inn for kven som skulle få tilbodet.

– Det var eit spennande møte. Det er ikkje kvar dag vi tilsett så mange leiarar på så høgt nivå, seier politimeister Kaare Songstad.

I følgje pressemeldinga, kjem tilsetjingane som følgje av omorganiseringa i samband med politireforma. I tillegg til kvalitetsheving og nye måtar å jobbe på, er omorganisering og ny organisasjonsstruktur ein del av reforma. Ny organisasjon for Vest politidistrikt går i endeleg drift 1. mars.

– Alle tilsette i politidistriktet har fått vita kor dei skal jobba i ny organisasjon. No byrjar den nye strukturen å fyllast med leiarar. Eg gler meg til å halda fram arbeidet med å vidareutvikla politidistriktet for å møta framtidas utfordringar, avsluttar politimeister Songstad.

Sperrevik har ikkje vore tilgjengeleg for kommentar.

jostein@osogfusa.no