Statsforvaltaren tilrår regional forskrift i bergensområdet. Dette er tiltaka
Statsforvaltaren i Vestland tilrår at regjeringa forskriftsfestar regionale tiltak for tolv kommunar, deriblant Bjørnafjorden.
Det opplyser Statsforvaltaren torsdag kveld.
Han har utarbeidd tilrådingane til regional forskrift i samråd med nasjonale helsestyresmakter.
Artikkelen held fram under annonsen.
– Kommunane i føretaksområdet til Helse Bergen får høve til å kome med innspel (i møte fredag, journ.mrk.) før tilrådingane går vidare til Helsedirektoratet og så til Helse- og omsorgsdepartementet. Dersom regjeringa vedtek regional forskrift, er det venta at det vil kunna skje innan førstkommande laurdag.
Statsforvaltaren tilrår å innføra regional forskrift i Alver, Askøy, Austevoll, Austrheim, Bergen, Bjørnafjorden, Kvam, Osterøy, Samnanger, Vaksdal, Voss og Øygarden.
Dette er forslaga til tiltak:
* Påbod om bruk av munnbind der det ikkje er mogleg å halda avstand innandørs i det offentlege rom og/eller på kollektivtransport.
* Påbod om at arbeidsgjevar syter for at tilsette i størst mogleg grad kan utføra arbeid utan auka risiko for smitte på arbeidsplassen, eller ved reiser med kollektivtransport til og frå arbeidsplassen.
* Avgrensingar i talet deltakarar på private arrangement.
* Plikt for serveringsstadar og arrangørar til å ha system for å registrera gjester og for å varsla gjester om smitteeksponering.
* Plikt til karantene fram til negativt prøvesvar på første test føreligg (ikkje berre ei tilråding som no) òg for born i skulealder som er husstandsmedlemer og tilsvarande nære til personar med påvist covid-19, uavhengig av vaksinasjonsstatus.
Artikkelen held fram under annonsen.
– Både kommunane og helseføretaka har gitt ei tydeleg tilbakemelding om at presset på tenestene er svært stort. Vi meiner at tiltaka er nødvendige for å halda kontroll på pandemien i regionen, og unngå ein situasjon der det kan vera fare for at kommunane og sjukehusa misser evna til å levera kritiske tenester, kommenterer Statsforvaltaren.
Han seier vidare at han meiner «tiltaka i seg sjølve er lite inngripande for born og unge, privatpersonar elles og næringslivet».