Svanesong for Havnesjefen

Os kommune gav måndag løyve til å fella knoppsvanehannen også kjend som Havnesjefen.

Det har til tider storma kring Havnesjefen. Etter ei rekkje negative hendingar der svana har hamna i søkjelyset, tok det for alvor av fredag.

Fredag føremiddag gjekk Havnesjefen til angrep på ei lita jente i Mobergsvika. Saka blei først omtala av Midtsiden.no. Havnesjefen skal ha svømt målretta inn mot stranda, teke tak i jenta og drege ho med seg. Osingen Ole Christian Brekke fekk med seg kva som skjedde, og hoppa i vatnet.

– Eg fekk gitt dottera mi frå meg og kasta meg ut i fjorden og fekk tatt tak i halsen på han slik at han slapp taket på jenta, som då var blitt dratt med delvis under vatn.

– Dette kunne blitt skikkeleg stygt, men han skjønte teikninga då eg drog han med meg fem seks meter utover vekk frå ungane. Då svømde han unna. Eg trur aldri eg har vore så full i adrenalin som då det stod på, fortel Brekke, til Midtsiden.no.

Kommunen handsama saka måndag

I etterkant av hendinga fredag har debatten rasa på internett. Nokre meiner at det etter fleire skumle hendingar, er på tide å avliva svana. Andre spør om det ikkje er mogleg å flytta han, medan nokon meiner at om folk berre let han vera i fred, så vil han ikkje gå til angrep. Etter innspel frå fagfolk og politikarar, skal ein sakshandsamar i kommunen koma med ein avgjerd om svanas framtid. Rett før klokka 16.00 fatta Bjørnefjorden Landbrukskontor på vegne av Os kommune eit vedtak som seier: Os kommune gjev løyve til å fella ein knoppsvanehann, også kjent som Havnesjefen. Løyvet gjeld frå 23.07.17 og 14 dagar fram. Resultat og effekt av tiltaket skal meldast til landbrukskontoret. Vedtaket har heimel i naturmangfoldlova §18 tredje ledd første punktum. Uttak etter denne delegasjonen reknast ikkje som enkeltvedtak og kan ikkje påklagast.