Tekne for bruk av amfetamin og hasj

Politiet tok ein person og to mindreårige for bruk av narkotiske stoff i natt.

Tre personar er melde for bruk av amfetamin og hasj i eit husvære i Os i natt. Kenneth Rastad ved Os lensmannskontor opplyser at dei to mindreårige ikkje høyrer heime i bygda, og vart transporterte heim av politiet fredag føremiddag.

Historikk avgjer reaksjon

- Vert reaksjonen ulik i forhold til dei som er under og vedkomande som er over den kriminelle lågalderen?

- Det kjem an på kva historikk dei har. Når det gjeld dei som ikkje er frå Os, vert det opp til lokale mynde å følgja opp etterforskinga. Elles er det vanleg å vurdera moglegheita for urinprøve-kontrakt, seier Rastad.

(Ein urinprøvekontrakt er ei frivillig ordning der pågripne leverer urinprøver med jamne mellomrom for å prova at dei er rusfrie, journ. mrk.)

Rastad opplyser at politiets aksjon vart utløyst av eit tips.