To hestar sprang mot politistasjonen. “Hestekviskrar” måtte hjelpa patruljen
Lause hestar skapte hovudbry for politiet.
Torsdag kveld fekk politiet melding om to lause hestar på Moberg, i fart i retning politistasjonen.
– Ei kvinne med kunnskap om desse flotte dyra, kom til unnsetning og saman med patruljen fekk dei hestane tilbake til rett stall, skriv politioverbetjent Anne Lyssand ved Bjørnafjorden politistasjon i ein e-post.
Artikkelen held fram under annonsen.
Dårleg sikt
Patruljen kontrollerte eit køyretøy på Søfteland torsdag kveld i 22.30-tida, skriv Lyssand vidare.
– Køyretøyet hadde dårleg sikt. Bilen blei stoppa ved Søfteland skule. Føraren, ei kvinne i 20-åra, vedtok eit forenkla førelegg på staden, skriv Lyssand.
Kvinna må ut med 3.700 kroner.
Laserkontroll
Onsdag var det kontroll i 80-sona på E39 ved Kolskogen. Resultatet var 16 forenkla førelegg. Torsdag var politiet på plass på Halhjemsvegen i 70-sona. Denne gongen blei resultatet «berre» fire forenkla førelegg. Høgaste hastigheit var 87 km/t. Ingen utslag på promille, opplyser Lyssand.
Trafikkuhell i låg fart
Torsdag føremiddag litt før klokka 12, skjedde eit trafikkuhell på Lyseklostervegen.
– Eit køyretøy trefte eit skilt. Føraren var ei kvinne i 40-åra. Ho hadde med seg ein passasjer. Airbag blei ikkje utløyst. Vegtrafikksentralen blei varsla for å reparera skiltet.
