To nye tilfelle av covid-19. Begge er importsmitte

To personar fekk påvist covid-19 i Bjørnafjorden kommune i går.

Begge er importsmitte og prøvene blei tatt på Flesland, opplyser kommunen.

Den eine som fekk påvist smitte er ein mann i 40-åra. Her er det ingen nærkontaktar. Den andre er ein mann i 20-åra. Her er ein nærkontakt sett i karantene.

– I tillegg har vi fått melding frå Bergen kommune om at nok ein arbeidar frå byggeplassen til Meny Industrivegen har testa positivt for covid-19, opplyser kommuneoverlege Klaus Melf.

Mannen bur i Bergen og er i karantene. Totalt er det no fem påviste smittetilfelle knytt til denne byggeplassen.

– Byggeplassen opnar i dag for arbeidarane som har vore i karantene og testa negativt minst sju døgn etter siste moglege eksponering, fortel Melf.