Tour Des Fjords kan starta i Os

Os kommune har fått tilbod om å vera vertskommune for første etappe. Ordførar Terje Søviknes fridde i dag til næringslivet for å få råd.

I fjor var Tour Des Fjords gjennom både Fusa og Os. Sykkelrittet hadde ein spurt gjennom Os, men det var også det heile. I år har kommunen fått tilbod om å vera delaktig i ein heilt annan skala.

- Me har fått tilbod om å vera vertskommune for første etappe, altså oppstarten av heile rittet, sa ordførar Terje Søviknes til næringslivets samlingspunkt, Os Næringsråd, i dag.

Det tyder mellom anna at presentasjonen av laga vil finna stad her, ein vil få eit eige barneritt, og TV2 vil senda live i fleire timar frå bygda.

- Men dette kostar litt. Dei skal ha 300.000 kroner for ein slik vertskommunefunksjon, sa ordføraren.

Avhengig av spleiselag

Han spurde difor næringslivet om 5-10 verksemder kunne forplikta seg på å spytta i 20.000 kroner kvar, og så kunne kommunen ta resten.

- Dette hastar veldig. Saka kjem i formannskapet 18. februar, og dei heng på oss no med spørsmål om me kjem til å ta på oss dette. TV2 er i full gang med planlegginga, og er alt no i ferd med å utforma løypeprofilar og grafisk utforming, sa Søviknes.

Han sa at for kommunen sin del er det vanskeleg å ta på seg slikt åleine, då ein heile tida står i skvis mellom det ein verkeleg må ha, som midlar til barnevern og skule, og krydderet som t.d. kommunalt fyrverkeri og sykkelritt.

- Men dersom me får eit spleiselag, er det med eitt mykje lettare også for kommunen å takka ja til å yta sin skjerv, la han til.

Marknadsføring i timevis på live TV

At noko slikt er verd mykje i marknadsføring, er heva over tvil. Det vil bli timevis med sending på TV2, og garantert pressedekning over heile linja.

- Dei som har følgt sykkelsendingar og høyrer på kommentatorane, veit at dei må fylla timane med noko. Då er det gode høve til å få marknadsført lokale ting, enten det er Lysøen, Lyse kloster, Oseana, Solstrand eller andre verksemder som dei kan setja fokus på, sa ordføraren.

Han avslutta appellen til Os-verksemdene med ein humørfylt oppfordring til å melda seg på spleiselaget.

- Dersom nokon har tankar om dette i pausen etterpå, så står eg klar med blokk og blyant, eg, så fiksar me dette.